ریاست اترپردیش کے ضلع بنارس میں کانگریس پارٹی کے کارکنان پر ہونے والے غلط مقدمات کی وجہ سے آج کانگریس کارکنان نے چیت گنج پولیس اسٹیشن پر احتجاج کرتے ہوئے گلاب کے پھول کا چھڑکاو کرکے تھانہ ایس او کو شکریہ کا خط دیا۔
کانگریس پارٹی کے کارکن ہریش مشرا نے کہا کہ کانگریس پارٹی کے کارکن جب بھی مظاہرہ کرتے ہیں تو پولیس ان پر کاروائی کرکے فرضی مقدمہ درج کر دیتی ہے۔
انہوں نے مزید کہا کہ 4 جولائی کو کانگریس پارٹی اپنے ضلعی صدر کی قیادت میں کانپور میں شہید ہوئے پولیس اہلکاروں کو خراج تحسین پیش کرنے کے لیے ایک پارک میں جمع ہوئے تھے لیکن بنارس کے چیت گنج تھانہ کے ایس او نے ان کارکنان کے خلاف مقدمہ درج کیا تھا۔
ہریش مشرا نے کہا کہ ہم مطالبہ کرتے ہیں کہ ہمارے اوپر لگائے گئے تمام فرضی مقدمات کو واپس لیا جائے کیونکہ ہم پولیس کی کاروائی کے ساتھ ہیں لیکن استحصال کو برداشت نہیں کریں گے۔
