پولیس سپرنٹنڈنٹ شیر سنگھ نے کہا کہ یہ معمول کی کاروائی ہے، جیسے ہی حکومت کے احکامات آئیں گے اس پر عمل کرنے کے ساتھ سکیورٹی کے لیے بی ایس ایف کے اہلکار تعینات کیے جائیں گے۔
جموں و کشمیر میں دفعہ 370 کے منسوخی کے بعد ، وہاں کی صورتحال سے نمٹنے کے لئے حکومت نے متعدد خاص لوگوں کے ساتھ ساتھ عام لوگوں کو بھی حراست میں لیا ہے۔
اب ایک بار پھر وادی سے قیدیوں کو ہریانہ کے 4 اضلاع میں منتقل کرنے کا سلسلہ شروع ہو چکا ہے جن میں جھجھر، کرنال اور فرید آباد کے یمنا نگر جیل شامل ہیں۔
ان جیلوں میں کشمیری قیدیوں کو منتقل کرنے کی تیاریاں آخری مراحل میں ہیں۔ سرکاری ذرائع کے مطابق جھجھر جیل میں 70، کرنال جیل میں 80 ، یمنا نگر جیل میں 50 اور فرید آباد جیل میں 200 قیدیوں کو منتقل کیا جانا ہے۔
جیل میں قیدیوں کے لئے اس طرح کے انتظامات کیے جارہے ہیں کہ ان قیدیوں کو یہاں آنے کے بعد کسی قسم کی پریشانی کا سامنا نہ کرنا پڑےگا، اور ان قیدیوں کو دیگر قیدیوں سے الگ رکھا جائے گا، حالانکہ کرنال جیل میں 61 قیدیوں کو پہلے سے ہی منتقل کیا جا چکا ہے۔
