جنوبی کشمیر میں ضلع پلوامہ کے آرہل علاقے میں کل رات دیر گئے ایک سڑک حادثے پیش آیا جب کہ اس میں 35 سالہ نوجوان جان بحق ہوگیا جس کی شناخت محمد یاسین بھٹ ولد محمد احسن بھٹ ساکن ارہل ڈانگرپورہ کے بطور کی گئی۔
اطلاعات کے مطابق محمد یاسین بائیک پر اپنے مکان واپس ہورہے تھے کہ مقابل سے آرہی ایک نامعلوم ٹاٹا موبائل گاڑی نے انہیں ٹکر ماری جس کی وجہ سے موقع پر ہی ان کی موت ہوگئی۔ ٹکر مارنے کے بعد ٹاٹا موبائل گاڑی کا ڈرائیور فرار ہوگیا۔
محمد یاسین کے اہل خانہ نے بتایا کہ یاسین پیشے سے مزدور تھے اور وہ حسب معمول مزدوری کرکے گھر واپس آرہے تھے۔ انہوں نے کہا کہ آرہل ڈانگر پورہ کے مقام پر ایک ٹاٹاموبائل گاڑی نے یاسین کو ٹکر ماری جس کی وجہ سے ان کی موت ہوگئی۔
وہیں مقامی لوگوں نے پولیس اور سول انتظامیہ سے فوری طور پر ٹاٹا موبائیل کے ڈرائیور کو گرفتار کرنے کا مطالبہ کیا اور متاثرہ کنبہ کو مناسب امداد فراہم کرنے کی اپیل کی۔ پولیس کے مطابق اس سلسلہ میں ایک مقدمہ درج کیا گیا اور ڈرائیور کی تاش کی جارہی ہے۔
واضح رہے کہ محمد یاسین اپنے خاندان میں واحد کمانے والے تھے جب کہ انہوں اپنے پیچھے بوڑھے ماں باپ، دو بچوں کے علاوہ اہلیہ کو چھوڑا ہے۔ مقامی لوگوں نے انتظامیہ سے خاندان کی بھرپور امداد کرنے کا مطالبہ کیا ہے۔
