کانگریسی رہنما آنند شرما کی قیادت میں پارلیمنٹ کمیٹی جموں وکشمیر کا دورہ کرے گی

جموں و کشمیر اور لداخ کی سکیورٹی و تعمیراتی صورتِ حال کا جائزہ لینے کے لئے کانگرس رہنما آنند شرما کی قیادت میں پارلیمنٹ اسٹینڈنگ کمیٹی 16 اگست سے چھ روزہ دورے کے لئے وادی آرہی ہے۔

پارلیمنٹ اسٹینڈنگ کمیٹی (داخلی امور) 16 اگست کو لیہہ پہنچ رہی ہے جہاں 17 اگست کو یہ عوامی وفود اور سکیورٹی کے اعلیٰ افسران سے ملاقات کرے گی۔ یہ کمیٹی کشمیر میں تین روزہ (18،19 اور 20 اگست) اور 21 اگست کو جموں میں عوامی وفود، سول افسران کے ساتھ گفتگو کرے گی۔

ذرائع کے مطابق کمیٹی دورے کے دوران ہند- چین اور پاکستان بھارت سرحدوں پر تعینات نیم فوجی دستوں کے کام کا جائزہ بھی لے گی۔

کمیٹی جموں وکشمیر کے لیفٹیننٹ گورنر منوج سنہا اور چیف سیکریٹری ارون کمار مہتا کے ساتھ بھی ملاقات کرے گی اور جموں وکشمیر کی مجموعی صورتِ حال کا جائزہ لے گی۔