سرینگر:مرکزی زیر انتظام جموں و کشمیر کی گرمائی راجدھانی سرینگر میں آج جموں و کشمیر نیشنلسٹ پیپلز فرنٹ کی طرف سے پارٹی کنونشن کا انعقاد کیا گیا جس میں پارٹی کے درجنوں کارکنوں نے شرکت کی جب کہ مختلف علاقوں سے تعلق رکھنے والے ڈی ڈی سی ممبران نے پارٹی کے چیئرمین مظفر وانی کی موجودگی میں باضابطہ طور پر شمولیت اختیار کی۔ اس دوران پارٹی کے چیئرمین مظفر وانی نے اپنے خطاب میں کہا کہ سابق خاندانی راج اب ختم ہونا چاہیے کیوں کہ اس نے جموں و کشمیر کے ایک ایک بچہ کا خون چوس لیا ہے، جموں و کشمیر کو انقلاب کی ضرورت ہے جو کوئی سیاسی پارٹی نہیں لا سکتا اگر لا سکتا ہے تو یہاں کا نوجوان جو جے کے این پی ایف سے جڑا ہوا ہے اور ہمیں ان دو گھرانوں کو مسترد کرکے نئی جماعت کو موقع دینا چاہیے جو لوگوں کی امنگوں اور خواہشات پر پورا اتر سکے۔
مظفر احمد نے اپنے کارکنوں سے پارٹی کو مضبوط کرنے کی اپیل کی ہے تاکہ آنے والے انتخابات میں ایک بڑی پارٹی سامنے ابھر کر آسکے۔ انہوں نے لوگوں سے کہا کہ دوبارہ جب ہم الیکشن میں آئیں گے تو ہم آپ سے ووٹ نہیں مانگیں گے۔ آپ خود ہمارے کام دیکھ کر ہمیں ووٹ دینا اگر ہم حقدار ہوں گے۔
