کوروناوائرس کے پھیلنے کے خدشات اور خطرات کے پیش نظر تہاڑ جیل کے قیدیوں نے ایک مکتوب کے زریعے جیل انتظامیہ سے اپیل کی ہے کہ انہیں اپنی ریاستوں یا زیر انتظام علاقوں کے قید خانوں میں منتقل کیا جائے۔
تہاڑ جیل کے کمپلکس میں جیل نمبر سے 6 سے 12 تک مقید تمام قیدیوں نے شکایت کی ہے کہ اس وقت ان جیلوں میں گنجائش سے زیادہ افراد بند ہیں۔ جس کے باعث یہاں کووڈ 19 کے خدشات پر کافی تشویش پائی جارہی ہے۔
تہاڑ جیل میں نہ صرف دیگر ریاستوں کے افراد بند ہیں بلکہ وادی کشمیر سے تعلق رکھنے والے کئی علیحدگی پسند رہنماؤں کے علاوہ 5اگست سے قبل حراست میں لیے گئے سینکڑوں نوجوان بھی قیدو بند ہیں۔
تہاڑ جیل کے ایک سینئر افسر نے ای ٹی وی بھارت کے ساتھ فون پر بات کرتے قیدیوں کی جانب سے مکتوب موصول ہونے کی تصدیق کرتے ہوئے کہا کہ خط کے زریعے قیدیوں کے خدشات اور اپیل کو اعلی حکام کی نوٹس میں لایا گیا ہے، جس پر ابھی عمل درآمد ہونا باقی ہے۔
دوسری جانب گزشتہ سال اگست سے ملک کی دیگر ریاستوں کے جیل خانوں میں بند نوجوانوں کے افراد خانہ نے بھی تشویش ظاہر کرتے ہوئے مرکزی حکومت سے اپیل کی ہے کہ کوروناوائرس کے اس عالمی وبا کو مدنظر رکھتےہوئے ان کی رہائی عمل میں لائی جائے۔
انسانی حقوق کے کارکن خرم پرویز نے بھی سرکار سے اپیل کی ہے کہ دنیا بھر میں پھیل رہے وبائی بیماری کے خطرات کے پیش نظر احتیاط کے طور 5اگست سے حراست میں لیے گئے نوجوانوں کو رہا کیا جائے تاکہ وہ اپنے گھروں میں محفوظ رہ سکیں۔
واضح ہو کہ تہاڑ جیل میں میاں عبدالقیوم، محمد الطاف شاہ، آسیہ اندرابی، ناہدہ نصرین، محمد یاسین ملک، شبیر احمد شاہ کے علاوہ کئی دیگر افراد مقید ہیں۔
