مرکز کے زیر انتظام جموں وکشمیر کی گرمائی دارالحکومت سرینگر میں پیر کو ایمپلائیز جوائنٹ ایکشن کمیٹی (JKEJAC) کی طرف سے ایک پریس کانفرنس کا انعقاد کیا گیا، جس میں سرکاری و عارضی ملازمین اور پنشنرس کے دیرینہ مطالبات کو پورا کرنے کی لیفٹینٹ گورنر انتظامیہ سے اپیل کی گئی۔
اس دوران جے سی سی کے سینئر لیڈر اور ریاستی جنرل سیکریٹری سید غلام رسول نے مرکزی و یونین ٹیریٹری حکومتوں پر زور دیتے ہوئے تمام درجے کے عارضی ملازمین، جو کہ 1994سے لیکر 2015ء تک تعینات کیے گئے، کو فورًا سے پیشتر مستقل کرنے کا مطالبہ کیا۔
انہوں نے اس ضمن میں SRO 520کو فوری طور کالعدم قرار دینے یا اس ’’امتیازی‘‘ ایس آر او میں لازمی اور فوری ترمیمات کرکے تمام درجہ کے عارضی ملازمین کو مستقل بنائے جانے کے احکامات صادر کرنے کی اپیل کی۔
وہیں انہوں نے یومیہ اجرت پر کام کر رہے عارضی ملازمین کی کئی ماہ سے رکی پڑی تنخواہوں کو فوری طور واگزار کرنے کی اپیل کی۔
