آر جے ڈی کے رہنما تیجسوی یادو کے این آر سی نافذ کرنے کی تیاری کرنے والے ٹویٹ پر جے ڈی یو رکن اسمبلی ماسٹرمجاہد عالم نے کہا کہ 'یہ بے بنیاد بات ہے۔'
انہوں نے کہا کہ 'این آر سی کے تعلق سے وزیراعلیٰ نتیش کمار پہلے ہی واضح کر چکے ہیں کہ بہار میں این آر سی کا کوئی سوال ہی پیدا نہیں ہوتا۔'
شہریت ترمیمی قانون، این آر سی اور این پی آر کی مخالفت میں آج کشن گنج ضلع کی مختلف پنچایتوں میں شاہین باغ کی طرز پر احتجاجی مظاہرے جاری ہیں۔
بہار میں شہریت ترمیمی قانون سے زیادہ لوگ این پی آر کے تعلق سے کافی خوفزدہ ہیں۔
کشن گنج ضلع کے عوام کا کہنا ہے کہ 'ہمارے علاقے میں ہر برس تباہ کن سیلاب آتا ہے اور ہر برس آتشزدگی کے واقعات ہوتے ہیں جس کی وجہ سے ہزاروں لوگ بے گھر ہوجاتے ہیں، ایسے میں کاغذات کو محفوظ رکھنا ممکن نہیں ہے۔'
اس درمیان راشٹریہ جنتا دل کے رہنما تیجسوی یادو کے اس ٹویٹ سے لوگوں میں ڈر کا ماحول ہے کہ نتیش کمار کی حکومت ریاست میں این آرسی کی تیاری کر رہی ہے۔
اس پر وضاحت پیش کرتے ہوئے جے ڈی یو رکن اسمبلی ماسٹرمجاہد عالم نے کہا کہ 'یہ بے بنیاد بات ہے۔ این آر سی کے بارے میں وزیر اعلیٰ نتیش کمار پہلے ہی بتا چکے ہیں کہ بہار میں این آر سی کا کوئی سوال ہی پیدا نہیں ہوتا۔'
انہوں نے مزید کہا کہ این پی آر میں پوچھے جانے والے جن سوالات کو لے کر لوگوں میں خوف ہے ان سوالات کو یقیناً ہٹایا جانا چاہیے اور اس سلسلے میں ہم لوگ محنت اور کوشش بھی کر رہے ہیں۔ خود وزیراعلیٰ بھی بیان دے چکے ہیں کہ این پی آر سے اختلافی سوالات ہٹا دئے جائیں گے۔'
انہوں نے مزید کہا کہ 'این آر سی اور این پی آر پر مخالفین عوام میں خوف کا ماحول پیدا کررہے ہیں جبکہ عوام کو اس سے ڈرنے اور گھبرانے کی کوئی ضرورت نہیں ہے۔'
