پولیس کو اس لاک ڈاون کو نافذ کروانے میں بہت جدوجہد کرنی پڑ رہی ہے، عموماً سبھی سڑکوں پر سناٹا چھا گیا ہے جو دکانیں اور بازار عام دنوں میں گلزار ہوا کرتے تھے، آج ویران نظر آ رہے ہیں مگر بہت سارے لوگوں میں اب بھی بیداری نہیں ہے کہ خود کی حفاظت کے لیے لاک ڈاون پر عمل کریں۔
آج دربھنگہ شہر کے کلکٹریٹ واقع لہیریا سرائے ٹاور چوک پر کمانڈوز پولیس انسپکٹر شیومنی پرساد کی قیادت میں مورچہ سنبھال رکھا تھا جہاں بلا ضرورت باہر نکلنے والوں پر کارروائی کی جا رہی تھی، کسی بھی شخص کو قانون کی خلاف ورزی کرنے پر نہیں بخشا جا رہا تھا اور ان پر جرمانہ عائد کیا جا رہا تھا نیز ان کی گاڑی کو پولیس تھانے میں لے جایا جا رہا تھا۔
اس دوران پولیس انسپکٹر شیومنی پرساد نے ای ٹی وی بھارت سے گفتگو کرتے ہوئے کہا کہ اب بھی 80 فیصد لوگ ہی لاک ڈاون کو سمجھ کر گھروں کے اندر ہیں، بیس فیصد کو ہم لوگ کوشش کر رہے ہیں کہ وہ بھی لاک ڈاون کو سمجھیں اور اپنی حفاظت کریں۔
