اردو قلم کاروں کی مالی معاونت کیلئے وزیراقلیتی فلاح کوعرضداشت

آل بہار اردو جرنلسٹ فورم، پٹنہ کے صدر اشرف استھانوی نے مالی بحران سے دوچار اردو قلم کاروں کی مالی معاونت کیلئے آج اقلیتی فلاح کے وزیر زماں خان سے ملاقات کرکے انہیں ایک عرضداشت پیش کی۔

استھانوی نے کہا کہ عالمی وبا کورونا قہر کے سبب پوری دنیا تباہی و بربادی کے دہانے پر ہے۔

اپنے ملک بھارت میں تو اس کا بہت زیادہ اثر پڑا ہے۔ بہار میں مسلسل لاک ڈاﺅن کے سبب ریاست کے اردو شاعروں ادیبوں، صحافیوں اور افسانہ نگاروں کی حالت دیگر گوں ہوگئی ہے۔

یہ لوگ سخت مالی بحران سے دوچار ہیں۔ اس سلسلے میں آج ریاست کے وزیراقلیتی فلاح و بہبود زماں خان سے ان کے دفتر میں ملاقات کرکے ایک عرض داشت پیش کی گئی۔

عرضداشت میں ریاست بہار کے اردو صحافیوں ،شاعروں اور ادیبوں کی سخت مالی دشواریوں کے سبب فی الفور ان سے ان قلم کاروں کی مالی اعانت کی اپیل کی گئی ہے۔

یواین آئی