ریاست بہار کے ارریہ میں اسمبلی انتخاب کے تحت تیسرے مرحلے میں ووٹنگ ہونے ہیں، ایسے میں ضلع انتظامیہ کی جانب سے مختلف مواقع پر رائے دہندگان کو بیدار کرنے کے لیے مختلف اقسام کے پروگرام منعقد کئے جا رہے ہیں، جن میں میراتھن دوڑ، کینڈل مارچ، نکڑ ناٹک وغیرہ شامل ہے.
اسی ضمن میں آج ارریہ کے سبھاش اسٹیڈیم میں انسانی زنجیر منعقد کرکے رائے دہندگان کو صد فیصد ووٹنگ کی اپیل کی گئی، انسانی زنجیر میں ارریہ ضلع کے فاربس گنج، نرپت گنج، سکٹی، جوکی ہاٹ، رانی گنج وغیرہ سے تقریباً ایک ہزار سے زائد تعلیمی مرکز، گرام سیوک دل اور مختلف سرکاری تعلیمی اداروں کے اساتذہ نے شرکت کی.
انسانی زنجیر میں الیکشن کمیشن کی جانب سے ارریہ ضلع کے برانڈ ایمبیسڈر و گلوکار امر آنند نے بھی شرکت کی اور لوگوں کا حوصلہ بڑھایا. ای ٹی وی بھارت سے بات کرتے ہوئے امر آنند نے کہا کہ حق رائے دہی کا استعمال بھارت کے ہر ایک فرد کا جمہوری حق ہے، اس سے پتہ چلتا ہے کہ ہم لوگ اپنے فرض اور بہتر سماج کے تئیں کتنے حساس ہے.
جمہوری ملک میں ووٹ کے ذریعہ ہی ہم اپنے نمائندے کا انتخاب کرتے ہیں جو ہمارے لیے ترقیاتی کام کرتے ہیں جس سے ہمارا شہر اور ضلع خوبصورت اور بہتر بنتا ہے.
ضلع کلیکٹر پرشانت کمار نے کہا کہ ارریہ میں تیسرے مرحلے میں انتخاب ہونا ہے، ایسے میں ہم لوگوں کی پوری کوشش ہے کہ یہاں صد فیصد ووٹنگ ہو، ووٹرس میں بیداری پیدا کرنے کے لیے ضلع انتظامیہ اپنے سطح ہر ممکن کوشش کر رہی ہے، معذور، بوڑھے، خواتین اور کورونا سے متاثر ووٹرس کے لیے الگ سے نظم کیا گیا ہے تاکہ انہیں کسی طرح کی پریشانیوں کا سامنا نا کرنا پڑے، اس موقع پر ضلع کلکٹر نے موٹر سائیکل ریلی کو ہری جھنڈی دکھا کر روانہ کیا.
