کیمور: وزیر اعلی نتیش کمار کی بڑی اسکیموں میں سے ایک 'نل جل' اسکیم کا فائدہ عام لوگوں تک نہیں پہنچ رہا ہے۔ بہار کے ضلع کیمور میں آج بھی ایک بڑی آبادی صاف پانی سے محروم ہے۔ عالم یہ ہے کہ اس اسکیم پر کہیں زور آور تو کہیں عوامی نمائندوں کا ہی قبضہ ہے۔ کاغذی طور پر یہ اسکیم صد فیصد کامیاب ہے، لیکن زمینی حقیقت کچھ اور ہی ہے۔
کیمور ضلع کے درگاٶتی، رامگڑھ، بھگوان پور، بھبھوا کے بلاک علاقہ کی بات کی جائے تو سبھی مقامات پر حقیقت ایک جیسی ہی ہے۔
ضلع کے ان بلاکز کے علاوہ چین پور، ادھورا اور بھگون پور ایسا بلاک ہے، جو پوری طرح سے جنگل اور پہاڑ پر آباد ہے۔ ان علاقوں میں پانی ایک بہت بڑا مسئلہ ہے، یہاں تین سو سے ڈھائی سو فٹ کی گہرائی میں پانی دستیاب ہے، جہاں پینے کے لیے صاف پانی آج بھی ایک سنگین مسئلہ ہے۔
مزید ادھورا، بھگوان پور اور چین پور کے درجنوں گاٶں ایسے ہیں۔ جہاں کے لوگ پوری طرح سے آرسینک پانی پینے پرمجبور ہیں۔ پانی کی قلت کا عالم یہ ہے کہ انسان و جانور کے لیے موسم گرما میں پینے کے لیے پانی ایک بڑا مسٸلہ ہے۔نہ جانے کتنے جانور بے موت پانی کی کمی کے سبب موت کا شکار ہو جاتے ہیں۔
ایسے میں ان علاقے کے لوگوں کو وزیر اعلی کی یہ اسکیم کافی پسند آئی اور اس امید کے ساتھ کہ اب انہیں صاف پانی بینے کو میسر ہوگا، لیکن برسوں سے نافذ اس سے عوام آج بھی مستفید نہیں ہورہے ہیں۔ اس گسکیم کا فائدہ خصوصاً انتہائی پسماندہ طبقے تک نہیں پہنچ پارہا ہے۔
بہر کیف بھگوان پور بلاک کے ایک گاؤں کنر چولہ جو پہاڑی کی دامن میں بسا ہوا ہے۔ یہاں کے وارڈ نمبر چھ میں گرام پنچایت کی طرف سے دو برس قبل نل جل اسکیم کے تحت 'پانی ٹنکی لگائی گئی۔ لیکن اس کا فائدہ عام لوگوں تک ملنے کے بجائے سیاسی رہنمائی ہی اٹھارہے ہیں۔ وارڈ ممبر اسکا استعمال گندم اور پیاز کی فصل کی سینچائی کے لیے کررہے ہیں۔
بھبھوا بلاک کے بیتری پنچایت کے کبار موضع میں سال بھر پہلے پانی کی ٹنکی لگائی گئی لیکن دو ماہ کے بعد ہی موٹر جل گیا۔
بھبھوا بلاک کے ببورا موضع کا بھی یہی حال ہے یہاں بھی موٹر جلا پڑا ہے، درگاٶتی بلاک کے خامی دورہ کھجورا گاٶں کا بھی یہی حال ہے۔
