چیف الیکشن افسر سنجے کمار سنگھ نے سوموار کو یہاں بتایا کہ 03 نومبر کو عام طور پر ووٹنگ کا وقت صبح سات بجے سے شام چھ بجے تک رہے گا۔ لیکن انتظامی وجوہات کی بناپر کھگڑیا کے بیلدور اور الولی اسمبلی حلقہ، دربھنگہ ضلع کے کوشیشور استھان اور گوڑا بورام اسمبلی حلقہ ، مظفر پور ضلع کے مینا پور ، پارو اور صاحب گنج اور ویشالی ضلع کے راگھو پور اسمبلی حلقہ میں ووٹنگ صبح سات بجے سے شام چار بجے تک ہوگی۔
مسٹر سنگھ نے بتایاکہ پر امن ووٹنگ کیلئے سیکوریٹی کے وسیع انتظامات کیے گئے ہیں۔ انہوں نے بتایاکہ اس مرحلہ میں ویب کاسٹ والے ووٹنگ مراکز کی تعداد 3548 ہے۔ وہیں 80 برس سے زائد عمر کے بزرگ اور معذوروں کیلئے 20240 پوسٹل بیلٹ جاری کیے گئے ہیں۔ اس کے علاوہ پٹنہ سیٹی اسمبلی حلقہ میں 80 سال سے زائد عمر کے بزرگوں اور معذور ووٹروںکو گھر سے پولنگ مراکز تک آنے ۔ جانے کیلئے پہلی بار آن ڈیمانڈ ٹیکسی سروس دہندہ کمپنی اوبر کے ذریعہ مفت ٹرانسپورٹ سروس دستیاب کرائی جارہی ہے ۔
اس مرحلہ کی ووٹنگ میں سڑک تعمیرات کے وزیر اور بھارتیہ جنتا پارٹی ( بی جے پی ) امیدوار نند کشور یادو ، دیہی ترقیات کے وزیر اور جنتادل یونائٹیڈ( جے ڈی یو ) امیدوار شرون کمار ، راشٹریہ جنتادل( آرجے ڈی ) صدر لالو پرساد یادو کے بیٹے اور سابق نائب وزیراعلیٰ تیجسوی پرساد یادو ، ان کے بڑے بھائی اور وزیر صحت تیج پڑتاپ یادو ، وزیر رام سیوک سنگھ ، مسٹر لالو یادو کے سمدھی چندریکا رائے ، کالی پانڈے، نتن نوین ، کانگریس لیڈر اور اداکار شتروگھن سنہا کے بیٹے لوسنہا ، آرجے ڈی کے پرنسپل جنرل سکریٹری اور سابق وزیر آلوک کمار مہتا ، سابق رکن پارلیمنٹ لولی آنند ، سابق رکن پارلیمنٹ راما سنگھ کی اہلیہ بینا سنگھ ،شیوہر سے مسلسل دو مرتبہ رکن اسمبلی محمد شرف الدین کی عزت داﺅ پر لگی ہے ۔
دوسرے مرحلہ میں جن 94 سیٹوں پر ووٹنگ ہونی ہے ان میں نوتن ، چن پٹیا ، بیتیا ، ہرسدھی ( محفوظ) ، گوند گنج ، کیسریا ، کلیان پور ، پپرا، مدھوبن ، شیوہر ، سیتامڑھی ، رونی سید پور ، بیلسنڈ ، مدھوبنی ، راج نگر ( محفوظ) جھنجھا ر پور ، پھلپراس ، کوشیشور استھان ( محفوظ ) گورام بورام ، بینی پور ، علی نگر، دربھنگہ دیہی ، مینا پور ، کانٹی ، بروراج ، پارو، صاحب گنج ، بیکنٹھ پور ، برولی ، گوپال گنج ، کچائے کوٹ ، بھورے ( محفوظ ) ہتھوا، سیوان ، زیرہ دئی ، درولی ( محفوظ) ، رگھوناتھ پور ، دروندا، بڑہریا ، گوریا کوٹھی ، مہاراج گنج ، ایکما ، مانجھی ، بنیا پور ، تریا ، مڑہورا، چھپرہ ، گرکھا، ( محفوظ ) ، امنور، پرساد ، سونپور ، حاجی پور ، لال گنج ، ویشالی ، راجاپاکر ( محفوظ) ، راگھو پور ، مہنار ، اجیا ر پور ، محی الدین نگر، ویبھوتی پور ، روسڑا( محفوظ) ، حسن پو ر، چیریا بریار پور ، بچھواڑہ ، تیگھڑا، مٹیہانی ، صاحب پور کمال ، بیگو سرائے ، بکھری ( محفوظ) ، الولی ( محفوظ ) ، کھگڑیا ، بیلدور ، پربتا ، بیہہ پور ، گوپال پور ، پیرپینتی( محفوظ ) بھاگلپور ، ناتھ نگر ، استھاواں ، بہار شریف ، راجگیر ( محفوظ) ، اسلام پور ، ہلسا، نالندہ ، ہرنوت ، بختیار پور ، دیگھا ، بانکی پور ، کمہرار ، پٹنہ صاحب ، فتوحہ ، دانا پور ، مینر ، اور پھلواری شریف ( محفوظ ) شا مل ہیں۔
ان 94 اسمبلی سیٹوں کیلئے 146 خواتین اور 1316 مرد امیدوار اور ایک تھرڈ جنڈر امیدوار انتخابی میدان میں ہیں۔ ان امیدواروں کی قسمت کافیصلہ دو کروڑ 86 لاکھ 11 ہزار 164 ووٹر 41362 پولنگ مراکز پر الیکٹرانک ووٹنگ مشین ( ای وی ایم ) کا بٹن ددبا کر کریںگے ۔ ان میں ایک کروڑ 50 لاکھ 33 ہزار 34 مرد ، ایک کروڑ 35 لاکھ 16ہزار 271 خواتین ، 980 تھر ڈ جینڈر اور 60879 سروس ووٹر شامل ہیں۔ سروس ووٹروں میں 57300 مرد اور 3579 خواتین ہیں۔
واضح رہے کہ مہاراج گنج اسمبلی حلقہ میں سب سے زیادہ 27 اور درولی ( محفوظ ) اسمبلی حلقہ میں سب سے کم چار امیدوار قسمت آزمارہے ہیں۔ اس انتخا ب میں سب سے زیادہ 56 امیدوار آر جے ڈی کے ہیں ۔ اسی طرح جے ڈی یو کے 43 ، بی جے پی کے45 ، لوک جن شکتی پارٹی ( ایل جے پی) کے 52 ، آر ایل ایس پی کے 36 ، بہوجن سماج پارٹی ( بی ایس پی ) کے 33 ، راشٹر وادی کانگریس پارٹی ( این سی پی ) کے 29 ، کانگریس کے 24 اور سی پی آئی اور سی آئی ایم کے چار۔ چار سمیت رجسٹرڈ اور قومی جماعتوں کے کل 623 اور آزاد 513 امیدوار انتخابی میدان میں اپنی قسمت آزمارہے ہیں۔
