بہار میں اسمبلی انتخابات سر پر ہے۔ انتخاب سے پہلے رکن اسمبلی نوشاد عالم نے دلے گاؤں کو تقریباً 18 کروڑ کی سوغات دی ہے۔ اس رقم سے ایک پل اور دو سڑکیں بنائی جائیں گی، جس کا افتتاح آج رکن اسمبلی کے ہاتھوں کیا گیا۔ اس موقع پر ایک جلسہ کا انعقاد کیا گیا جس میں ہزاروں کی تعداد میں لوگ شریک ہوئے۔
نوشاد عالم نے گذشتہ پانچ سالوں میں کیے گئے اپنے کاموں کو گنایا ساتھ ہی آئیندہ انتخاب میں مجلس اتحاد المسلمین، راشٹریہ جنتا دل و دیگر پارٹیوں سے دوری بنائے رکھنے کی نصیحت بھی کی۔
نمائندہ ای ٹی وی بھارت نے جب پوچھا کہ آپ این آر سی اور این پی آر پر خاموش کیوں رہے تو انہوں نے کہا کہ این آر سی اور این پی آر پر بولنے کے لیے کچھ بھی نہیں ہے۔ ہماری سرکار پہلے ہی کہہ چکی ہے کہ بہار میں این آر سی نہیں ہوگی۔ این پی آر بھی پرانے طریقے سے ہی ہوگا۔ میچھی ندی پر پل بنانے کو لیکر انہوں نے کہا کہ مجھ سے پہلے کئی رکن اسمبلی آئے گئے ممکن ہو انہوں نے بھی کوشش کی ہوگی لیکن نہیں ہو سکا۔ میں نے مسلسل کوشش کی، دفاتر کے چکر کاٹے، متعلقہ شعبہ کے زمہ داران سے ملا تب جا کر یہ کام ممکن ہو سکا ہے۔ یقیناً آج کا دن دلے گاوں پنچایت کے لوگوں کے لیے عید کا دن ہے۔
