ریاست اترپردیش کے ضلع نوئیڈا میں پانی کے تحفظ اور بارش کے پانی کو جمع کرنے کے سلسلے میں جوائنٹ سکریٹری، وزارت پنچایت راج اور حکومت ہند کے آلوک پریم ناگر نے تینوں اتھارٹی کے علاوہ بلدیہ اور نگر پنچایت کے ساتھ جائزہ میٹنگ میں کہا کہ آنے والی نسل کے لیے گرتے ہوئے آبی سطح اور پانی کی بچت ایک اہم مسئلہ بنتا جارہا ہے لہذا تمام متعلقہ افسران کو اس سلسلے میں خصوصی توجہ دینی ہوگی تب ہی ہم آنے والی اپنی نسل کو پینے کا صاف پانی مہیا کراسکیں گے۔
میٹنگ کے دوران انہوں نے اس مہم سے متعلقہ تمام عہدیداروں کو ہدایت دی کہ کام کی رپورٹیں بروقت دستیاب کی جائیں تاکہ حکومت کو رپورٹ پیش کی جائے اور جل شکتی سے متعلق کتابچے تیار کرکے زیادہ سے زیادہ تشہیر کی جانی چاہیے تاکہ پانی کی بچت ہوسکے۔
جوائنٹ سکریٹری نے آبی بجلی اور شجرکاری مہم کے لیے ضلعی مجسٹریٹ اور اس کے ساتھی افسران کے کام کو سراہا اور کہا کہ اسی طرح ایکشن پلان تیار کرکے حکومت کے پلان کو پورا کیا جانا چاہیے۔
انہوں نے مزید کہا کہ تمام متعلقہ افسران واٹر ہارویسٹینگ اور پانی بچانے کے حوالے سے اپنا ایکشن پلان تیار کریں اور مقررہ وقت میں چیف ڈویلپمنٹ آفیسر کو دستیاب کرائیں تاکہ پانی کے غلط استعمال کی روک تھام کے ساتھ بارش کا پانی بھی روکا جائے۔
انہوں نے کہا کہ زیادہ سے زیادہ رین واٹر ہارویسٹینگ پلانٹ لگایا جائے اور سوختہ گڑھے بنائے جائیں تاکہ زمینی پانی میں اضافہ ہوسکے اور آنے والی نسل کو پینے کا صاف پانی دستیاب ہو سکے، اجلاس کے بعد کلکٹریٹ میں تیار چھوٹے گھنے جنگل کا معائنہ جوائنٹ سکریٹری نے کیا۔
اجلاس میں چیف ڈویلپمنٹ آفیسر انیل کمار سنگھ ، ڈسٹرکٹ ڈویلپمنٹ آفیسر انور شیخ ، تینوں اتھارٹی کے افسران ، بلدیہ اور نگر پنچایت کے عہدیدار اور دیگر محکمہ جاتی افسران بھی موجود رہے۔
