ریاست اترپردیش کے نوئیڈا پریس کلب میں صحافیوں سے مخاطب راجندر پال گوتم نے کہا کہ اترپردیش کی عوام حکومتی جبر اور سماجی عدم تحفظ سے خوفزدہ ہے، نظم و ضبط کی صورت حال بد سے بدتر ہے، بد عنوانی اپنے عروج پر ہے اس لیے یوپی کی عوام کسی تبدیلی کی منتظر ہے، ایسے میں عام آدمی پارٹی بہترین متبادل ثابت ہوگی۔
انھوں نے کہا کہ عام آدمی پارٹی معاشی ترقی اور سماجی انصاف کو اپنی ترجیح بنانے کا عہد کیا تھا، جس کی مثال دہلی میں عام آدمی پارٹی کی حکومت نے پیش کی ہے۔
انھوں نے مزید کہا کہ اترپردیش اور مرکزی حکومت سے ہر آدمی پریشان ہے، کسانوں سے ان کی زمین چھیننے کی کوشش ہو رہی ہے، کسان سڑکوں پر ہیں ان کا کوئی پرسان حال نہیں ہے، وہ شدید سردی میں بے یار و مددگار سڑکوں پر پڑے ہوئے ہیں لیکن حکومت کمبھ کرن کی نیند سوئی ہوئی ہے۔
انھوں نے کہا کہ جس طرح دہلی میں عام آدمی پارٹی نے صاف شفاف حکومت قائم کر کے لوگوں کو دکھایا ہے کہ اترپردیش میں بھی عوام اسی طرح کی حکومت کی خواہش رکھتے ہیں۔
