ریاست اترپردیش کے صنعتی شہر نوئیڈا کے ضلعی اسپتال کے کوڑے دان میں پی پی ای کٹس ملنے سے انتظامیہ حرکت میں آگیا ہے۔
آپ کو بتا دیں کہ یہاں ہسپتال میں استعمال ہونے والی پی پی ای کٹس کو عام کوڑے دان میں پھینک دیا گیا جس سے مزید انفیکشن کے بڑھنے کا اندیشہ پیدا ہو گیا ہے۔
کورونا وائرس انفیکشن سے بچنے کے لئے ڈاکٹرز کو دی جانے والی پرسنل پروٹیکشن ایکیوپمنٹ کٹ (پی پی ای کٹ) کا استعمال کووڈ گائیڈ لائن اور بایو میڈیکل ویسٹ کے ضابطے کے تحت کیا جاتا ہے۔
لیکن نوئیڈا کے ضلعی ہسپتال میں استعمال کے بعد عام کوڑے دان میں پی پی ای کٹ پھینک دیا گیا ہے جس کی وجہ سے ہسپتال میں کافی تشویش کا ماحول ہے، کیونکہ اس کی وجہ سے انفیکشن پھیلنے کا خطرہ مزید بڑھ گیا ہے۔
اس سارے معاملے کے تعلق سے ضلعی انتظامیہ نے تحقیقات کا حکم دے دیا ہے۔ سی ڈی او انیل کمار نے کہا کہ اس بات کی تفتیش کرنا ضروری ہے کہ ان پی پی ای کٹس کو کس نے پھینکا ہے۔
کووڈ گائڈ لائن اور بایومیڈیکل ضابطے کے مطابق ہی ان کیٹس کو ضائع کرنا پڑتا ہے۔ اس کے لئے ہسپتال میں سرخ، سیاہ، پیلا اور سفید رنگ کے کوڑے دان پہلے سے رکھے گئے ہیں۔
پی پی ای کٹ استعمال کے بعد ہائپوکلورائٹ میں ڈبویا جاتا ہے، اور بعد میں اسے پیک کرکے قرنطینہ مراکز سے نکلنے والے کوڑے کے پیلے تھیلے میں جمع کرا کر بایومیڈیکل ویسٹ ٹریٹمنٹ بھیجنا ہوتا ہے۔
