ریاست اترپردیش کے ضلع گوتم بدھ نگر میں کورونا وائرس کے مریضوں میں مسلسل اضافہ ہورہا ہے، آج بھی کورونا سے متاثر 239 مریضوں کی تصدیق کی گئی۔
ضلع میں کورونا کے کیسز میں اضافے پیش نظر آج ضلع مجسٹریٹ سہاس ایل وائی نے محکمہ صحت، پولیس اور دیگر متعلقہ افسران کے ساتھ ورچوئل میٹنگ کی جس میں تمام افسران کو الرٹ رہنے کی ہدایت دی ہے۔
ضلع مجسٹریٹ نے کہا کہ اسپتالوں میں کورونا کے علاج کے تمام مناسب انتظامات اور ہر ممکنہ علاج کو محکمہ صحت کے عہدیداران یقینی بنائیں اور کورونا کے انفیکشن پر قابو پانے کے لیے تمام وسائل کو بروئے کار لاتے ہوئے ہر سطح پر کارروائی کی جائے تاکہ تمام لوگوں کو کورونا وائرس کے انفیکشن سے تحفظ فراہم کیا جا سکے۔
اس موقع پر انہوں نے اتھارٹی کے افسران کو گاڑیوں کے مناسب انتظامات اور صفائی ستھرائی کے متعلق بھی ضروری ہدایات دی۔
