رایست اترپردیش کے ضلع نوئیڈا میں شاردا اسپتال سے پندرہ کورونا مریضوں کو ڈسچارج کیا گیا ہے نیز دو مشتبہ مریضوں کو بھی اسپتال سے چھٹی دے دی گئی ہے، گزشتہ رات ان سب کی رپورٹ منفی آئی تھی۔
کسی بھی اسپتال سے ایک ساتھ اتنی بڑی تعداد میں صحتیابی یا ڈسچارج ہونے کا یہ پہلا موقع ہے۔
اترپردیش حکومت کے نامزد افسر ڈاکٹر دیویندر ورشنے ، ڈی جی ایم ای آفیسر ڈاکٹر گنیندر کمار ، نوڈل آفیسر ڈاکٹر ابھیشیک ترپاٹھی کے ساتھ نیز شاردا یونیورسٹی کے پروفیسر چانسلر وائی کے گپتا اور شاردا اسپتال کے میڈیکل سپرنٹنڈنٹ ڈاکٹر اشوتوش نرنجن نے سب کو ڈسچارج لیٹر بھی دیا۔
شاردا اسپتال سے اب تک 49 مثبت مریضوں کو ڈسچارج کیا گیا ہے جبکہ 56 مریض زیر علاج ہیں اور توقع کی جارہی ہے کہ وہ بھی جلد صحت مند ہوں گے اور گھر چلے جائیں گے۔
آج مریضوں میں سی آر پی ایف جوان ستیویر بھی 6 بچوں کے ساتھ ڈسچارج ہوئے۔ ان کے چہرے کی خوشی قابل دید تھی۔ ڈاکٹروں ، نرسوں اور ان کی خدمت میں مصروف دیگر ممبران نے پھول نچھاور کرنے کے بعد ہر ایک کو الوداع کردیا۔ شاردا اسپتال کے میڈیکل سپرنٹنڈنٹ ڈاکٹر آشوتوش نرنجن نے کہا کہ ہم مریضوں کو بہتر سہولیات کی فراہمی کے لیے پرعزم ہیں۔
