وزیراعظم نریندر مودی نے ریاست مہاراشٹر کے ویرار میں واقع ایک اسپتال میں آگ لگنے سے کورونا مریضوں کی موت پر رنج کا اظہار کیا ہے اور مرنے والوں کے کنبوں کے لئے دو دو لاکھ روپے اور زخمیوں کے لئے 50 ہزار روپے کے معاوضے کی رقم کو منظوری دی ہے۔
نائب صدر ایم وینکیا نائیڈو نے بھی ویرار میں آگ لگنے سے جان و مال کے نقصان پر گہرے رنج و غم کا اظہار کیا ہے۔
انہوں نے متاثرین سے تعزیت کا اظہار کرتے ہوئے کہا کہ وہ زخمیوں کی جلد صحتیابی کی تمنا کرتے ہیں۔
قابل ذکر ہے کہ مہاراشٹر کے پالگھر ضلع کے ویرار میں واقع وجے ولبھ اسپتال کے کووڈ سینٹر میں آتشزدگی کا المناک واقعہ پیش آیا ہے۔ اسپتال کے آئی سی یو میں رات کے تقریباً 3 بجے آگ بھڑک اٹھی جس کے سبب آئی سی یو میں زیر علاج 17 مریضوں میں سے 13 مریضوں کی موت ہو گئی۔
مزید پڑھیں: پالگھر: اسپتال میں آگ لگنے سے 13 کورونا مریض ہلاک، وزیر اعلی نے جانچ کا حکم دیا
ادھر مہاراشٹر کے نائب وزیر اعلیٰ اجیت پوار نے مرنے والے مریضوں کو خراج عقیدت پیش کیا اور غمزدہ کنبوں کے تئیں گہری تعزیت کا اظہار کیا۔
انہوں نے کہا کہ 'اسپتالوں کی حفاظت کے لئے رہنما ہدایات جاری کئے جانے کے باوجود ناسک اور ویرار جیسے واقعات کافی افسوسناک ہیں۔'
انہوں نے مزید کہا کہ پالگھر ضلع کلکٹر سے واقعہ کی تفصیلی جانکاری لی گئی ہے اور حادثے میں بچے دیگر مریضوں کی حفاطت اور ان کے بہتر علاج کے لئے ہدایات جاری کر دی گئی ہیں۔
نائب وزیر اعلیٰ نے کہا کہ معاملے کو سنجیدگی سے لیا گیا ہے اور اعلی سطحی کمیٹی واقعہ کے اسباب کی جانچ کرے گی۔ انہوں نے کہا کہ وزیر اعلیٰ ادھو ٹھاکرے نے واقعہ کی جانچ کے احکامات صادر کیے ہیں اور جانچ کے بعد اصل حقائق سامنے آئیں گے۔
