بھگت سنگھ کوشیاری کو توہین عدالت کا نوٹس

اتراکھنڈ ہائی کورٹ نے مہاراشٹر کے گورنر اور اتراکھنڈ کے سابق وزیر اعلیٰ بھگت سنگھ کوشیاری کو ہائی کورٹ کے حکم پر عمل درآمد نہ کرنے کے معاملے میں توہین عدالت کا نوٹس جاری کر کے کہا ہے کہ وہ چار ہفتے میں جواب داخل کریں۔

جسٹس شرد کمار شرما کی بینچ نے منگل کے روز دہرادون کی غیر سرکاری تنظیم (این جی او) رورل لِٹیگیشن اینڈ اینٹائیٹلمینٹ کیندر کی جانب سے دائر توہین عدالت کی عرضی پر شنوائی کرتے ہوئے یہ نوٹس جاری کیا ہے۔ عرضی گذار نے عدالت کو بتایا کہ سابق وزیر اعلیٰ بھگت سنگھ کوشیاری کے خلاف دائر توہین عدالت کی عرضی قابل سماعت ہے۔ عرضی دائر کرنے سے قبل تمام رسمی کاروائی پر عمل درآمد کیا گیا ہے۔ مسٹر کوشیاری کو 60 روز پہلے نوٹس جاری کیا گیا ہے۔
انہوں نے بتایا کہ عدالت نے معاملے کی شنوائی کرتے ہوئے مسٹر کوشیاری کو نوٹس جاری کرکے چار ہفتے میں جواب دینے کی ہدایت دی ہیں۔ عرضی گذار نے مسٹر کوشیاری کو بطور سابق وزیراعلیٰ کو فریق بنایا ہے۔
قابل ذکر ہے کہ اتراکھنڈ ہائی کورٹ سے ریاست کے سابق وزیر اعلیٰ بھگت سنگھ کوشیاری کو سرکاری رہائش گاہ اور دیگر سہولتوں کے الاٹمنٹ کے معاملے میں گذشتہ برس تین مئی کو بازار کی شرح پر بقایا جمع کرنے کی ہدایت دی گئی تھی۔ عرضی گذار کا الزام ہے کہ مسٹر کوشیاری نے آج تک عدالت کی ہدایت پر عمل درآمد نہیں کیا ہے۔