ویلنٹائن ڈے کے خلاف کرانتی شیوسینا کی 'لٹھ پوجا'

مظفر نگر میں ہندو تنظیم کرانتی شیوسینا نے لاٹھی، ڈنڈوں کی پوجا کی ہے۔ یہ پوجا ویلنٹائن ڈے منانے والوں کی مخالفت میں ہوئی ہے۔

ریاست اترپردیش کے ضلع مظفر نگر میں پرکاش چوک شہر میں کرانتی شیوسینا کے دفتر پر لٹھ پوجا کا اہتمام کیا گیا۔

جس میں ویلنٹائن ڈے کی مخالفت کرنے والے تمام کارکنوں اور عہدیداروں نے لٹھ پوجا کی اس دوران کرانتی شیوسینا سے وابستہ تمام کارکنان اور عہدیدار موجود تھے۔

کرانتی شیوسینا افسر منوج سینی نے کہا کہ 'آئندہ 14 فروری کو ویلنٹائن ڈے ہے، ہم سب اس دن کی مخالفت کرتے ہیں اس دن کے لیے ہم لوگوں نے آج یہاں دفتر پر لٹھ پوجن کا پروگرام منعقد کیا۔'

انہوں نے کہا اگر ویلنٹائن ڈے والے دن کوئی بھی نازیبا حرکت، یا کسی پارک میں بےشرمی کرتے ہوئے پایا جاتا ہے تو اس کی خبر ہمارا لٹھ لے گا۔

غور طلب ہے کہ ہر برس 14 فروری کو مختلف سخت گیر ہندو تنظیمیں ویلنٹائن ڈے منانے والوں کے خلاف اپنے طور پر کارروائی کرتی ہیں۔ ان تنظیموں کا ماننا ہے کہ اس دن محبت کرنے والے جوڑے سرعام نازیبا حرکت کرتے ہیں۔