جبرا فیس لینے والے اسکولوں کے خلاف سخت کارروائی کی جائے گی

کورونا وبا کے سبب ہوئے طویل لاک ڈاؤن کے دوران اسکولوں کے بند رہنے کے باوجود بھی اسکول انتظامیہ فیس وصولنے میں کسی طرح کی نرمی نہیں برت رہی ہے۔ بلکہ بعض اسکولوں نے فیس نا جمع کرنے کے سبب طلبہ کو امتحانات سے محروم کر دیا گیا ہے۔

ان مسائل کے پیش نظر مہاراشٹر حکومت میں وزیر تعلیم ورشا گائکواڈ نے کہا ہے کہ' اسکول انتظامیہ کو ایسی صورت میں نرمی برتنی چاہئے، کیونکہ لاک ڈاؤن کے سبب ہر شعبہ بری طرح سے متاثر ہوا ہے ۔ورشا گایکواڈ نے کہا کہ' فیس کے تعلق سے بچوں کے والدین کو پریشان کرنے والے اسکول انتظامیہ کے خلاف کارروائی کی جائے گی۔

حالانکہ آر ٹی ای کے تحت ہر ایک کو تعلیم حاصل کرنے کا پورا حق ہے، لیکن اسکول انتظامیہ فیس نا دینے کے سبب بچوں کے ساتھ سخت رویہ اختیار کرتے ہیں، لاک ڈاؤن کے سبب اسکولز بند ہیں، آن لائن کلاس کے نام پر پوری فیس وصول کرتے ہیں۔ حالانکہ اس طرح کی وصولی کے تعلق سے کچھ غیر سرکاری تنظیموں نے ہائی کورٹ سے رجوع کیا ہے، لیکن اب تک اُس کا کوئی خاطر خواہ نتیجہ نہیں نکلا ہے۔