این سی پی کے قومی ترجمان اور مہاراشٹر کے اقلیتی وزیر نواب ملک نے کہا کہ دہلی میں احتجاج کر رہےکسانوں کی حمایت میں ممبئی کے آزاد میدان میں 23 جنوری تا 25 جنوری کو ہونے والے احتجاج میں شرد پوار اور وزیراعلیٰ ادھو ٹھاکرے شریک ہوں گے۔
نواب ملک نے پریس کانفرنس میں کہا کہ 'این سی پی نے کسانوں کی تحریک کی حمایت کی ہے کیوں کہ مرکزی حکومت کی جانب سے بنائے گئے نئے زرعی قوانین کے خلاف ہے۔
ریاستی وزیر نواب ملک نے یہ بھی واضح کیا کہ اب مہاوکاس اگھاڑی کی تینوں جماعتیں اور ان کے قائدین بشمول وزیراعلیٰ بھی اس احتجاج میں حصہ لیں گے۔
انہوں نے کہا کہ سنگھو بارڈر پر کسان گزشتہ تقریباً دو ماہ سے مرکزی حکومت کے ذریعہ لائے گئے زرعی قوانین کو منسوخ کرنے کا مطالبہ کررہے ہیں لیکن حکومت کسانوں کے مطالبات منظور نہیں کر رہی ہے جو کہ ناانصافی ہیں تاہم سپریم کورٹ نے اس قانون پر روک لگا دی ہے جبکہ کسانوں تنظیموں اور حکومت کے مابین متعدد میٹنگیں ہوچکی ہیں لیکن کوئی حتمی فیصلہ نہیں نکلا۔
واضح رہے کہ شرد پوار کو کسانوں کا رہنما کہا جاتا ہے اور وہ ہمیشہ کسانوں کے شانہ بشانہ کھڑے رہتے ہیں۔ اس معاملے میں صدر رام ناتھ کووند سے ملاقات کرنے والے وفد میں شرد پوار بھی شامل تھے۔
