مہاراشٹر کے صنعتی شہر کے طور پر اپنی منفرد شناخت رکھنےوالا شہر بھیونڈی ان دنوں فضائی آلودگی اور خراب ماحولیات کو لیکر سرخیوں میں ہے۔
بتایا جارہا ہے کہ کارپوریشن انتظامیہ آلودگی کے خاتمے کے لیے کوئی ٹھوس اقدام کرنے میں ناکام رہا۔
شہر میں پاورلوم کارخانوں سے نکلنے والے باریک کاٹن کے ریزے ہوا میں تیرتے رہتے ہیں، جس کی وجہ بیماریاں خصوصاً ٹی بی کے مریضوں کی تعداد میں اضافہ ہورہا ہے۔ اسکے علاوہ موتی کے کارخانوں اور اسکے کلرنگ پلانٹ سے نکلنے والا دھواں آب و ہوا کو اس قدر متاثر کررہا ہے کہ شہری روز مرہ کے معمولات کوانجام دینے کے لیے ماسک کا سہارا لینے پر مجبور ہوگئے۔
سڑکوں پر جگہ جگہ گڈھے، پاورلوم اور موتی کارخانوں سے نکلنے والے سینتھٹکس اور کارپوریشن کے ڈمپنگ گراؤنڈ میں کچرے کو جلانے کے سبب بھیونڈی میں ماحولیاتی آلودگی کے گراف میں دن بہ دن اضافہ ہورہا ہے۔
غیر سرکاری تنظیم کے کرائے گئے ایک سروے کے مطابق بھیونڈی شہر باریک ریزہ اڑنے کی درجہ بندی میں پانچویں مقام پر ہے۔
زیرِ زمین ڈرینیج لائن ڈالنے کی کھدائی کے دوران فضائی آلودگی کو روکنے والے تمام قوانین کی خلاف ورزی کی جارہی ہے۔
مقامی عوام کے مطابق قوانین کی کھلی خلاف ورزی کے باوجود میونسپل انتظامیہ کے افسران اور عوامی نمائندے خاموش تماشائی بنے ہوئے ہیں۔
علاقہ کی عوام آلودگی سے پاک شہر کا مطالبہ کررہی ہے اور اس بات کو یقینی بنانے پر زور دیا جارہا ہیکہ آلودگی کے ذمہ داروں کے خلاف سخت کاروائی کی جائے۔
