وزیر اعظم نریندر مودی نے مہاراشٹر کے وزیر اعلی ادھو ٹھاکرے کی اس تجویز کو قبول کر لیا کہ جس میں انہوں نے مذہبی رہنماؤں کو مذہبی پروگرامز کا اہتمام کرنے سے گریز کرنے کے لیے کہنے کی بات کہی تھی۔
چیف منسٹر آفس (سی ایم او) نے بتایا کہ ٹھاکرے نے یہ تجویز مودی کے ساتھ صبح ایک ویڈیو کانفرنس کے دوران پیش کی۔
کورونا وائرس کے پھیلاؤ کو روکنے کے طریقوں پر تبادلہ خیال کرنے کے لیے مودی نے تمام وزرائے اعلیٰ کے ساتھ ویڈیو کانفرنس کی۔
سی ایم او نے ایک بیان میں کہا کہ 'وزیر اعظم نے ٹھاکرے کی تجویز کو قبول کیا ہے اور تمام وزرائے اعلی سے کہا ہے کہ وہ اپنی اپنی ریاستوں کے مذہبی رہنماؤں سے بات کریں اور ان سے سوشل ڈسٹنسنگ کی ضرورت اور بڑے اجتماعات سے گریز کرنے کے بارے میں بتائیں۔'
اس میں کہا گیا کہ مودی نے ٹھاکرے کے اس نظریہ کی بھی حمایت کی کہ لاک ڈاؤن کے دوران شہریوں کو اچھی ذہنی صحت میں رہنے کی ضرورت ہے۔
ریاستی وزیر صحت راجیش ٹوپے، وزیر داخلہ انل دیشمکھ، وزیر سیاحت آدتیہ ٹھاکرے اور سینیئر بیوروکریٹس نے بھی ویڈیو کانفرنس میں شرکت کی۔
