مہاراشٹر کے دارالحکومت ممبئی سے متصل صنعتی شہر بھیونڈی میں تھانے 'فوڈ اینڈ ڈرگس' محکمہ نے دو گودام پر چھاپہ مار کر لاکھوں روپے مالیت کاممنوعہ گٹکھا پان مسالہ ضبط کیا ہے۔
ذرائع سے موصولہ اطلاعات کے مطابق تھانہ افسران نے بھیونڈی شہر وٹھل نگر میں ایک خفیہ اطلاع کی بنیاد پر دو گودام میں چھاپہ مار کر بڑے پیمانے پر گٹکھے کا ذخیرہ ضبط کیا ہے۔جس کی مالیت 12 لاکھ 14 ہزار268روپے بتائی جاتی ہے۔
فوڈ اینڈ ڈرگس ایڈمنسٹریشن کے افسر شنکر راٹھور کو خفیہ اطلاع ملی تھی کہ وٹھل نگر کی دو بند دکانوں میں بڑے پیمانے پر ممنوعہ گٹکھا غیر قانونی کاروبار کے لیے رکھا ہواہے۔
مزید پڑھیں: جی پی ایس سے لیس ایمبولنس عنقریب وادی میں متعارف
جس کے بعد اسسٹنٹ کمشنر بھوشن موریے افسر مانک جادھو، پردیپ کنٹے اور اروند کھڑکے کی ٹیم نے نارپولی پولیس کی مدد سے مذکورہ بند دکانوں کا تالا کھول کر شکھر، پکار سمیت مختلف برانڈز کا ممنوعہ گٹکھا ضبط کرتے ہوئے مذکورہ گودام کو سیل کرتے ہوئے گٹکھا تاجر عبداللہ خان کے خلاف نارپولی پولیس اسٹیشن نے معاملہ درج کرا دیا ہے۔
