ریاست اترپردیش کے مراد آباد تھانہ مجھولہ علاقے کے نگر پنچایت افغان پور میں راستے میں پلر لگائے جانے کی وجہ سے دو فریقوں میں اختلاف ہو گیا ایک طرف کے لوگوں کا کہنا تھا کی وہ اپنی زمین پر مٹی ڈال رہے ہیں جبکہ دوسرے فریق کا دعویٰ ہے کہ ادھر سے ان کی زمین کے لیے راستہ نہیں ہے۔
اس تنازعہ کے ایک فریق مجاہد حسین نے دعویٰ کیا ہے کہ انہیں جعلی کیس میں پھنسایا جا رہا ہے۔
مجاہد حسین کے مطابق جب انہوں نے اس معاملے کی شکایت اغوان پور پولیس چوکی انچارج سے کی تو انچارج نے مجاہد حسین کے کنبہ کے چار لوگوں کے خلاف ’’سرکاری کام میں رکاوٹ‘‘ اور ’’پولیس سے بدتمیزی‘‘ کے الزام میں مقدمہ درج کر لیا۔
مجاہد حسین نے ای ٹی وی بھارت سے بات کرتے ہوئے پولیس پر الزام عائد کیا کہ ’’پولیس بے وجہ ہمیں مقدمے میں پھنسا رہی ہے۔‘‘ مجاہد حسین نے مرادآباد ایس پی سٹی امت آنند کے یہاں انصاف کی گہار لگاتے ہوئے کہا ہے کہ اس معاملے کی اعلیٰ افسران سے جانچ موجودہ سی سی ٹی کیمرے کی بنیاد پر کی جائے۔
