سائیکل ریلی پارٹی دفتر دارالعوام سے شروع ہوکر شہر کے مختلف چوک و چوراہوں سے گزرتی ہوئی توپ خانہ روڈ پر واقع پارٹی دفتر پر ختم ہوئی۔ اس ریلی کی قیادت اعظم خان کے چھوٹے بیٹے و رکن اسمبلی عبداللہ اعظم نے کی۔
جیسے جیسے ضمنی انتخاب کے لیے پولنگ کی تاریخ نزدیک آرہی ہے ویسے ہی تمام امیدوار اپنی تشہیری مہم اور سیاسی طاقت کا مظاہرہ کر رہے ہیں۔
سیاسی مبصرین کے مطابق رامپور اسمبلی سیٹ سماج وادی پارٹی کے لیے عزت و وقار کا مسئلہ بن چکا ہے۔ یہاں مقابلے میں ایک طرف حکمراں جماعت کے امیدوار بھارت بھوشن گپتا ہیں تو وہیں دوسری جانب سماجوادی پارٹی کے قدآور رہنما اور رکن پارلیمان اعظم خاں کی اہلیہ ڈاکٹر تزئین فاطمہ ہیں۔
اپنے طے شدہ پروگرام کے تحت آج سماجوادی پارٹی نے اعظم خاں کی اہلیہ کی حمایت میں سائیکل ریلی کا اہتمام کیا۔ ممبر اسمبلی عبداللہ اعظم نے سائیکل چلاکر اس ریلی کی قیادت کی۔
انتخابی تشہیر اور اپنی طاقت کا مظاہرہ کرنے کے مقصد سے منعقد کی گئی اس سائیکل ریلی میں کارکنان کی وہ تعداد دکھائی نہیں دی جتنی توقع کی جا رہی تھی۔ شاید اسی وجہ سے ریلی کی قیادت اعظم خاں نے نہیں کی، اعظم خان پارٹی دفتر تو پہنچے لیکن کارکنان کی کم تعداد دیکھ کر ریلی کی قیادت عبداللہ اعظم کو سونپ دی۔
اعظم خان نے گذشتہ روز ایک جلسے کے دوران کہا بھی تھا کہ سائیکل ریلی میں وہ بھی سائیکل چلائیں گے۔ لیکن آج وہاں موجود رہنے کے باوجود بھی وہ اس ریلی میں شامل نہیں ہوئے۔
