میرٹھ کے اس علاقے کا نام خوشحال نگر کالونی رکھنے کے پیچھے شائد اس علاقے کے لوگوں کا مقصد اپنے علاقے کو خوش حال دیکھنا رہا ہو گا، لیکن میرٹھ کے پچھڑے علاقوں میں شمار یہ علاقہ نہ صرف بسنے کے بعد سے ہی بنیادی سہولیات کی کمی کا شکار رہا بلکہ غیر قانونی کام کرنے والوں کی پناہ گاہ بن گیا، علاقے میں جوئے سٹے بازی اور نشے کے کاروباریوں کے خلاف مقامی لوگوں نے آواز اٹھائی اور زمینی سطح پر کوشش کر کے علاقے سے ان برائیوں کو کافی حد تک ختم کرنے میں کامیابی بھی حاصل کی۔
میرٹھ کی امن ویلفیئر سوسائٹی کے ذریعے اب مقامی افراد نہ صرف سماجی برائیوں کو ختم کرنے کے لیے مسلسل کوشش کر رہے ہیں بلکہ تعلیمی اور سماجی بیداری کے لیے بھی اپنی جانب سے ہر طرح کی کوششیں کر رہے ہیں۔
سوسائٹی کی کوششوں سے علاقے کے ماحول میں ہو رہی تبدیلی کو مقامی باشندے بھی محسوس کر رہے ہیں۔اور سماجی تبدیلی کی ان کوششوں میں اپنا تعاون بھی کر رہے ہیں۔
خوشحال نگر کے لوگ اب اس سوسائٹی کے بینر تلے ہر جمعہ کو میٹنگ کا انعقاد کرتے ہیں اور اصلاح معاشرہ کے تعلق سے تبادلہ خیال کر کے زمینی سطح پر لائحہ عمل بھی تیار کرتے ہیں۔
