اترپردیش کے ضلع بستی میں خطرے کے نشان کے قریب پہنچ چکی سریو ندی کی بڑھتی طغیانی اور اونچی اٹھتی لہروں سے کم سے کم 100 دیہات کے باشندوں کی رات کی نیند اور دن کا چین اڑا ہوا ہے۔
آفیشیل ذرائع نے ہفتہ بتایا کہ سریو ندی خطرے کے نشان 92.730میٹر کے قریب پہنچ گئی ہے۔ ندی کی آبی سطح میں ایک سینٹی میٹر فی گھنٹے کے حساب سے اضافہ ہو رہا ہے جس کے بعد اتوار تک ندی کی آبی سطح کے 92.770میٹر تک پہنچ جانے کے امکانات ہیں۔ پہاڑی اور میدانی علاقوں میں ہو رہی تیز بارش اور بیراج سے پانی چھوڑے جانے کی وجہ سے ندی کے بہاؤ میں تیزی اور سیلاب کے آثار ہیں۔
ندی کے تیز کٹان سے کٹاریا گاؤں کے پاس بنے ٹھوکر کا اگلا حصہ تقریبا 20میٹر تک تباہ ہوگیا ہے۔ ندی کا تیز دباؤ سفید آباد باندھ پر پارا گاؤں کے پاس بنا ہوا ہے۔
کٹان کو روکنے کے لئے سیلاب کنٹرول کے افسران و ملازمین کلیان پور گاؤں میں بورے میں مٹی ڈال کر دباؤ روکنے کی کوشش کر رہے ہیں۔
ریونیو پولیس اور سیلاب کنٹرول کے افسران سیلاب سے بچاؤ کے لئے مختلف طریقہ کار پر غور کر رہے ہیں۔
