اترپردیش حکومت کے ترجمان نے بتایا کہ پولیس اہلکاروں کے استعمال میں آنے والی پی پی ای کٹ، سینیٹائزر، ڈسپپوزیبل ماسک/گلاس کی خریداری کے لئے ریاستی حکومت نے 47کروڑ 33لاکھ روپے جاری کیے ہیں۔
انہوں نے بتایا کہ اس ضمن میں اڈیشنل ڈائرکٹر جنرل آف پولیس ہیڈکوارٹر کی جانب سے گذشتہ 4اپریل کو ایک خط اڈیشنل چیف سکریٹری (ریونیو) کو بھیجا گیا تھا۔ جمعہ کو 47کروڑ33 لاکھ روپے کی رقم مالی سال 2020۔21 کے لئے منظور کی گئی۔
ترجمان نے بتایا کہ اس رقم کو استعمال کرتے ہوئے ڈسپوزیبل ماسک کی جگہ پر ہر پولیس اہلکار کو دو ماسک، جو دھونے کے بعد بھی دوبارہ استعمال کرسکتے ہیں، کو خریدا جائےگا۔ انہوں نے کہا کہ جس مد میں حکومت کی جانب سے رقم دی جارہی ہے اسی مد میں وہ رقم خرچ کی جائےگی۔
غور طلب ہے کہ کورونا وبا سے نمٹنے کے لیے پولیس اہلکار اپنی ڈیوٹی سر انجام دے رہے ہیں، ایسے میں اترپردیش حکومت کی جانب سے اس فنڈ کی منظوری سے انہیں پروٹیکشن کٹ مل سکے گی، جس سے وہ خود کو زیادہ محفوظ تصور کریں گے۔
