بی جے پی کے رکن پارلیمان کوشل کشور کی بہو انکیتا کی ایک نئی ویڈیو وائرل ہوئی ہے۔ اس ویڈیو میں روتے ہوئے انکیتا کہتی ہیں 'میں بے قصور ہوں اور اب میرے زندہ رہنے کی کوئی وجہ نہیں ہے۔ میں آپ کی زندگی میں دوبارہ کبھی نہیں آنے والی ہوں۔ میں اس دنیا سے جارہی ہوں'۔
اترپردیش کے دارالحکومت میں موہن لال گنج سے بی جے پی کے ممبر پارلیمنٹ کوشل کشور کی بہو انکیتا کی ایک نئی ویڈیو وائرل ہوگئی ہے۔ ویڈیو میں روتے ہوئے انکیتا نے رنج و غم کا اظہار کیا ہے اور آیوش کے ساتھ اپنے ازدواجی تعلقات کا انکشاف کیا ہے۔
انکیتا اس وائرل ویڈیو میں روتی ہوئی نظر آ رہی ہیں اور اپنے شوہر آیوش کے ساتھ اپنے رشتے کے تعلق سے بھی بات کی۔ انہوں نے خود کو بےقصور بتاتے ہوئے کہا کہ آیوش میری کوئی غلطی نہیں ہے اور تم نے میرے جینے کی کوئی وجہ نہیں چھوڑی۔ اس ویڈیو کے وائرل ہونے کے بعد پولیس محکمہ میں ہلچل مچ گئی۔ متعدد تھانوں کی پولیس انکیتا کی تلاش میں روانہ ہوگئی۔ انسپکٹر مڈیانو منوج کمار سنگھ کے مطابق ویڈیو وائرل ہونے کے بعد انکیتا نے اپنا موبائل فون بند کر دیا ہے۔ پولیس اس کی لوکیشن تلاش کرنے میں مصروف رہی۔
5 منٹ 10 سیکنڈ کی اس ویڈیو میں انکیتا نے روتے ہوئے کہا کہ میں نے کچھ نہیں کیا تھا۔ میری کوئی غلطی نہیں ہے۔ آپ اور آپ کے اہل خانہ نے مجھ پر جھوٹے الزامات لگائے۔ آیوش میں نے کیا غلطی کی ہے۔ میں نے تم سے محبت کر کے غلطی کی ہے کیا؟ تمہارے ساتھ رہی یہ غلطی کی؟ تم سے شادی کی ، یہ غلطی کی؟ خوش تھی میں جیسی بھی تھی۔ غلط کیا تم نے میرے ساتھ، میرے جینے کی وجہ نہیں چھوڑی تم نے۔
