ریاست اترپردیش کے شہر ایودھیا میں بابری مسجد پر فیصلہ آنے کے بعد مسجد کی تعمیر کا کام 26 جنوری سے شروع ہوگا اور صبح ساڑھے آٹھ بجے پہلے پرچم کشائی ہوگی اور پھر مسجد کا سنگ بنیاد رکھا جائے گا۔
واضح رہے کہ اس موقع پر شجرکاری بھی کی جائے گی، اور مسجد کی بنیاد رکھے جانے سے قبل 23 جنوری کو ایودھیا کے روناہی میں پانچ ایکڑ اراضی پر مٹی کی جانچ (سائیلنگ ٹیسٹنگ بھی کی جائے گی۔
انڈو اسلامک ثقافتی فاؤنڈیشن کے سکریٹری اطہر حسین نے کہا کہ یہ پروگرام بہت سادہ ہوگا اور اس موقع پر بورڈ کے تمام نو اراکین موجود ہوں گے۔
اطہر حسین نے کہا کہ انڈو اسلامک ثقافتی فاؤنڈیشن (آئی سی ایف) ٹرسٹ کا اتوار کو ایک ورچوئل اجلاس ہوا اس میں تمام نو ٹرسٹیز نے حصہ لیا۔
اجلاس کی صدارت چیئرمین زفر احمد فاروقی نے کی اور انہوں نے بتایا کہ میٹنگ میں یہ فیصلہ کیا گیا ہے کہ ایودھیا ڈسٹرکٹ بورڈ سے منظوری کے لیے درخواست اور پانچ ایکڑ پلاٹ کی مٹی جانچ کا عمل 23 جنوری سے شروع کیا جائے گا اور اس کے ساتھ ہی اس منصوبے کا باضابطہ آغاز کردیا جائے گا۔
اطہر حسین نے کہا کہ انڈو اسلامک ثقافتی فاؤنڈیشن (آئی آئی سی ایف) اس برس دھنی پور مسجد منصوبے کے آغاز کے ساتھ یوم جمہوریہ منایا جائے گا۔
مسجد کی تعمیر کے ساتھ ہی وہاں ایک ہسپتال، میوزیم، لائبریری، کمیونٹی کچن، انڈو اسلامک کلچرل ریسرچ سینٹر، ایک پبلشنگ ہاؤس بھی تعمیر کیا جائے گا۔
اطہر حسین نے کہا کہ 26 جنوری کی صبح ساڑھے آٹھ بجے دھنی پور مسجد منصوبے کے پانچ ایکڑ اراضی پر قومی جھنڈا لہرایا جائے گا اس کے بعد ارکان ٹرسٹی اور آئی آئی سی ایف کے چیف ٹرسٹیز شجر کاری کریں گے اور آخر میں ٹرسٹی مسجد کی بنیاد بھی رکھیں گے۔
