'حیراں ہوں دل کو روؤں کہ پِیٹوں جِگر کو میں'

مولانا کلب صادق اتحاد بین المسلمین کے داعی تھے۔ انھوں نے شیعہ سنّی خلیج کو کم کرنے اور دوریاں مٹانے میں اہم کردار ادا کیا اور کامیابی حاصل کی۔ یہی نہیں بلکہ وہ فرقہ وارانہ ہم آہنگی کے لیے بھی برابر کوشاں رہتے تھے۔ ان کی وفات ملت اسلامیہ کا ناقابلِ تلافی خسارہ ہے۔

شیعہ مسلک کے معروف عالم دین مولانا کلب صادق کے انتقال پر ریاست اترپردیش کے ضلع رامپور کے معروف شیعہ عالم دین مولانا سید محمد زماں باقری نے اپنے گہرے رنج و غم کا اظہار کرتے ہوئے مولانا کلب صادق کی خدمات کو یاد کیا۔ اس موقع پر انہوں نے کہا کہ مولانا کلب صادق کے انتقال سے قوم و ملت جو نقصان پہنچا ہے اس کی بھرپائی ممکن نہیں۔

معروف شیعہ عالم دین اور آل انڈیا مسلم پرسنل لاء بورڈ کے نائب صدر مولانا کلب صادق طویل علالت کے بعد اپنے مالک حقیقی سے جا ملے۔ ان کے انتقال کی خبر سے ملک و ملت کے تمام افراد شدید رنج و غم میں ڈوبے ہوئے ہیں۔

مولانا سید محمد زماں باقری نے مولانا کلب صادق کے سانحہ ارتحال پر اپنے گہرے رنج و غم کا اظہار کرتے ہوئے کہا کہ مولانا صادق کا انتقال ملت اسلامیہ کا عظیم خسارہ ہے۔

انہوں نے کہا کہ ملک و ملت کی تعمیر میں مولانا کلب صادق کی بے شمار کاوشیں نظر آتی ہیں۔ انہوں نے کہا کہ ان کا سب سے بڑا کارنامہ ملت میں اتحاد قائم کرنا ہے۔

مولانا باقری نے کہا کہ مولانا کلب صادق نے خصوصی طور پر شیعہ سنی اتحاد کو مضبوط کرنے کے لئے اپنا سب کچھ قربان کر دیا۔ وہیں مولانا سید محمد زماں باقری نے مولانا کلب صادق کے یونیٹی کالج کا تذکرہ کرتے ہوئے کہا کہ ان کا ایک بڑا کارنامہ یونیٹی کالج لکھنؤ کا قیام ہے۔

انہوں نے کہا کہ یہ یونیٹی کالج وہیں ہے جہاں بلا تفریق مذہب و ملت سبھی طلبا و طالبات تعلیم حاصل کرتے ہیں۔ انہوں نے کہاکہ' مولانا کلب صادق کی شخصیت اس شعر کی حامل ہے۔

سورج ہوں روشنی کی رمق چھوڑ جاؤں گا

میں ڈوب بھی گیا تو شفق چھوڑ جاؤں گا