کوشامبی: پولیس ٹیم پر حملہ، داروغہ۔سپاہی زخمی

اترپردیش کے ضلع کوشامبی کے سینی علاقے کے نرسنگھ پور کچھوا گاؤں میں چوری کے نامزد ملزمین کے گھر دبش دینے پہنچی پولیس ٹیم پر ملزمین کے اہل خانہ نے حملہ کردیا جس میں ایک داروغہ اور تین پولیس اہلکار زخمی ہوگئے۔

پولیس نے اس معاملے میں دو خواتین سمیت چھ افراد کے خلاف نامزد رپورٹ درج کر کے تین لوگوں کو گرفتا رکیا ہے۔ پولیس ذرائع کے مطابق نرسنگھ پور کچھوا گاؤں کے پنٹو اور سنٹو دو سگے بھائی ہیں۔ کچھ دن پہلے شیتلا دھام کڑا تھانہ علاقے کے دارانگر قصبہ واقع ایک بجلی کے ٹرانسفارمر کا تیل چوری کر نے کے معاملے میں ان کے خلاف نامزد رپورٹ درج تھی۔جن کی گرفتاری کے لئے بدھ کی رات شیتلا دھام کڑا کی پولیس ٹیم نے گھر پر چھاپہ ماری کی۔
دونوں ملزمین گھر سے فرار ہونے میں کامیاب رہے۔ مشتعل اہل خانہ نے پولیس ٹیم پر حملہ کردیا جس میں داروغہ کرشنا راج سنگھ اور سپاہی دلیپ سنگھ زخمی ہوگئے۔ اطلاع ملتے ہی کثیر تعداد میں کئی تھانوں کی پولیس پہنچ گئی۔ پولیس نے دو خواتین سمیت 3 افراد کو گرفتار کیا ہے۔