کانگریس نے 15 سیٹوں پر 'ووٹ کٹوا' کا کردار ادا کیا، اگر عآپ سے اتحاد ہوتا تو بی جے پی ہار جاتی

تجزیہ کاروں کے مطابق دہلی کے اسمبلی انتخاب میں کانگریس نے کئی سیٹوں پر عآپ کا کھیل بگاڑ دیا۔

نئی دہلی: دہلی اسمبلی انتخابات 2025 کے نتائج کے بعد ایک طرف بی جے پی کے کیمپ میں جشن کا ماحول ہے تو دوسری طرف عام آدمی پارٹی اپنی شکست کا جائزہ لینے میں مصروف ہے۔ وہیں نتائج کے اعلان کے بعد جو چیز سب سے زیادہ موضوع بحث ہے وہ 'کانگریس کا کردار' ہے۔ دہلی انتخابات میں کانگریس بھلے ہی تیسری بار اپنا کھاتہ تک نہیں کھول سکی مگر اس نے کم سے کم 15 سیٹوں پر عام آدمی پارٹی کا کھیل بگاڑ دیا۔ اسی کے پیش کئی مبصرین اور تجزیہ نگار کانگریس پر 'ووٹ کٹوا' کا کردار ادا کرنے کا الزام عائد کر رہے ہیں۔

نمبر	سیٹ	جیت	ووٹ مارجن	کانگریس کے ووٹ
1	تمار پور	بی جے پی	1168	8361
2	بادلی	بی جے پی	15163	41071
3	ناگلوئی جاٹ	بی جے پی	26251	32028
4	مادی پور	بی جے پی	10899	17958
5	راجیندر نگر	بی جے پی	1231	4015
6	نئی دہلی	بی جے پی	4089	4568
7	جنگ پورہ	بی جے پی	675	7350

اعداد و شمار بتاتے ہیں کہ ان 15 سیٹوں پر بی جے پی کی جیت اور عآپ کی شکست کا جو مارجن ہے، کانگریس نے اس سے کہیں زیادہ ووٹ حاصل کیے۔ سیاسی تجزیہ کاروں کے مطابق اگر کانگریس اور عآپ کے بیچ اتحاد ہوتا اور کانگریس نے ان سیٹوں پر عآپ کی حمایت میں اپنے امیدوار کھڑے نہیں کیے ہوتے تو عآپ کے امیدوار ان سیٹوں پر جیت جاتے۔ اس طرح عام آدمی پارٹی جیتی ہوئی 22 سیٹوں کے علاوہ 15 مزید نشستیں جیت لیتی، جس سے اس کی جیتی ہوئی سیٹوں کی تعداد 37 ہو جاتی اور اس طرح وہ اکثریت کا ہندسہ عبور کر لیتی۔ واضح رہے کہ دہلی اسمبلی میں 70 سیٹیں ہیں اور حکومت سازی کے لیے 36 نشستوں کی ضرورت ہوتی ہے۔

آئیے ان 15 سیٹوں اعداد و شمار کو تفصیل سے جانتے ہیں۔

8	کستوربا نگر	بی جے پی	11048	18617
9	مالویہ نگر	بی جے پی	2131	6770
10	مہرولی	بی جے پی	1782	9731
11	چھترپور	بی جے پی	6239	6601
12	سنگم وہار	بی جے پی	344	15863
13	گریٹر کیلاش	بی جے پی	3188	6711
14	تری لوک پوری	بی جے پی	392	6147
15	مصطفیٰ آباد	بی جے پی	17578	33474

اعداد و شمار کے مطابق دہلی کی جن سیٹوں پر عآپ کے امیدواروں کو بہت کم فرق سے شکست کا سامنا کرنا پڑا، اس میں عام آدمی پارٹی کے بڑے لیڈر منیش سسودیا کا نام بھی شامل ہے، جو محض 675 ووٹوں سے ہار گئے۔ اس کا مطلب ہے کہ اگر عآپ اور کانگریس مل کر دہلی کا الیکشن لڑتے تو شاید نتیجہ کچھ اور ہوتا۔

دہلی میں تمار پور سے بی جے پی امیدوار نے 1168 ووٹوں کے فرق سے کامیابی حاصل کی۔ یہاں کانگریس امیدوار کو 8361 ووٹ ملے۔ وہیں بادلی سے بی جے پی کے امیدوار نے 15163 ووٹوں سے کامیابی حاصل کی جب کہ کانگریس کے امیدوار کو 41071 ووٹ ملے۔ اس کے علاوہ نانگلوئی جاٹ سے بی جے پی نے 26251 ووٹوں سے کامیابی حاصل کی، جب کہ کانگریس کے امیدوار کو 32028 ووٹ ملے۔ اس میں جنگ پورہ، تری لوک پوری، سنگم وہار، راجندر نگر اور مہرولی ایسی سیٹیں ہیں جہاں بی جے پی نے بالترتیب 675، 392، 344، 1231، 1782 ووٹوں سے کامیابی حاصل کی، جو کہ بی جے پی کی جیت کی سب سے کم مارجن والی سیٹیں ہیں۔