اتر پردیش کے متعدد علاقوں میں آسمانی بجلی گرنے کے نتیجے میں پانچ افراد ہلاک ہوگئے جبکہ ایک زخمی ہوگیا ہے۔
ہلاک ہونے والے پانچ افراد کا تعلق الہ آباد، ایودھیا، ماؤ، بلیا اور بستی سے ہے جبکہ زخمی فرد کا تعلق ضلع بستی سے ہے۔
حکومت کے بیان میں کہا گیا ہے کہ اتر پردیش کے وزیر اعلی یوگی آدتیہ ناتھ نے اموات پر رنج و غم کا اظہار کیا ہے اور ضلعی مجسٹریٹوں کو ہدایت کی ہے کہ وہ ہلاک ہونے والے افراد کے لواحقین کو چار لاکھ روپے کی مالی مدد فراہم کریں۔
وزیر اعلی نے زخمی شخص کا طبی علاج یقینی بنانے کی بھی ہدایت کی۔
واضح رہے کہ اس سے قبل جمعرات کے روز، ریاست کے مختلف حصوں میں آسمانی بجلی گرنے سے 24 افراد ہلاک، 20 افراد اور 46 جانور زخمی ہوئے تھے۔
