بی جے پی کے قول وفعل میں تضاد:اکھلیش

سماج وادی پارٹی کے سربراہ اکھلیش یادو نے کہا ہے کہ بی جے پی کے قول وفعل میں زمین آسمان کا فرق ہے۔ وہ جو کہتے ہیں وہ کرتے نہیں ہیں بلکہ جوکہتے ہیں اس کے برخلاف کام کرتے ہیں۔

اکھلیش یادو نے منگل کو کہا کہ بی جے پی حکومت کے سبھی وعدے حقیقت کی کسوٹی پر جھوٹے ہی نکلے ہیں۔ آٹھ مہینے میں گھریلو رسوئی گیس کی قیمت میں 190روپیے کا اضافہ کیا گیا ہے۔ مفاد عامہ کی بی جے پی کی یہی کہانی ہے۔

بی جے پی نے کسانوں کی آمدنی دوگنی کرنے کا خواب دکھایا لوگ اس کے دھوکے میں جینے لگے کسی بھی کسان کی آمدنی دوگنی نہیں ہوئی بلکہ اس پر مزید قرض کا بوجھ بڑھ گیا۔

انہوں نے کہا کہ ندی کے صفائی کے دعویداروں کو گومتی کی حالت دکھائی نہیں دیتے ہیں۔ ریاست کے گڑھا سے پاک ہونے کا دعوی کرنے والے نائب وزیر اعلی کیشو پرساد موریہ کو خود ہی نہیں پتہ ہوگا کہ وہ اس ضمن میں کتنے بار دعوی کرچکے ہیں۔اس ضمن میں نئی نئی تاریخ دیتے رہتے ہیں۔ ویسے بھی جب سے بی جے پی اقتدار میں آئی ہے عوام کو صرف تاریخ پر تاریخ ہی مل رہی ہے۔

سابق وزیر اعلی نے دعوی کیا کہ بی جے پی کی مرکزی حکومت ہو یا ریاستی حکومت دونوں نے عوام الناس کو تکلیف دینے کے علاوہ کچھ کام نہیں کیا ہے۔ مہنگائی، بدعنوانی اور بد انتظامی سے سبھی پریشان ہیں۔ یہ حکومتیں سبھی محاذپر ناکام ہیں۔ ریاست کی بدنامی تو ملک کے باہر تک ہوگئی ہے۔ عوام نے اب بی جے پی حکومت کو ووٹ کی چوٹ دینے کا فیصلہ کرلیا ہے۔

(یو این آئی)