'کانگریس اقتدار میں آئی تو ملک سے غربت ختم کردے گی'

جیسے جیسے انتخابات کی تاریخ نزدیک آرہی ہے، ویسے ہی سیاسی پارٹیاں عوام کو اپنی طرف مائل کرنے کے لیے بڑے بڑے وعدے کر رہی ہیں۔

اس سلسلے میں منگل کے روز اترپردیش کے دارالحکومت لکھنؤ میں کانگریس پارٹی دفتر میں سینئر رہنما پی ایل پونیا نے پریس کانفرنس میں کہا کہ' جس طرح سے کانگریس پارٹی کے قومی صدر راہل گاندھی نے ملک کے ہر غریب خاندان کو سالانہ 72 ہزار روپے دینے کا وعدہ کیا ہے، ہم اقتدار میں آنے کے بعد اس وعدے کو ہر حال میں پورا کریں گے'۔

انہوں نے کہا کہ' اس اسکیم کے تحت ملک کے پانچ کروڑ کنبوں کو فائدہ پہنچے گا'۔

ہماری پارٹی بی جے پی کی طرح صرف جملے بازی نہیں کرتی، بلکہ جو وعدہ کرتی ہے اسے ہر حال میں پورا بھی کرتی ہے'۔

پی ایل پونیا نے کہا کہ' آزادی کے بعد ملک میں تقریبا 70 فیصدی عوام غریب طبقے سے تعلق رکھتے تھے۔ لیکن کانگریس نے سنہ 2011۔12 تک غریبی کی سطح کو کم کرکے 20 فیصد تک لے آئی'۔

ہم وعدہ کرتے ہیں کہ انتخابات 2019 میں اقتدار میں آنے کے بعد غریبی کو ہمیشہ کے لیے ملک سے ختم کر دیں گے۔