'پھولوں کی بات کرنے والی یوگی حکومت اب لاٹھی کی بات کر رہی ہے'

ریاست اتر پردیش میں عالمی وبا کورونا وائرس کے دوران اپنی جان جوکھم میں ڈال کر عوامی خدمات انجام دینے والے ایمبولنس ڈرائیور گزشتہ تین دنوں سے ہڑتال پر ہیں۔

کانگریس جنرل سیکریٹری پرینکا گاندھی نے ہڑتالی ایمبولنس ڈرائیوروں کے خلاف کارروائی پر طنز کرتے ہوئے کہا کہ ’’ایمبولنس ڈرائیوروں پر پھول برسانے کی بات کرنے والی یوپی حکومت تنخواہ کا مطالبہ کرنے پر لاٹھیاں برسا رہی ہے۔‘‘

پرینکا گاندھی نے جمعرات کو ٹوئٹ میں لکھا ’’یوپی میں کورونا بحران کے دوران حکومت ایمبولنس ملازمین پر پھولوں کی بارش کرنے کی بات کرتی تھی اور انہوں نے جیسے ہی اپنے حق کی آواز اٹھائی حکومت ان پر لاٹھیاں برسانے کی بات کررہی ہے۔‘‘

انہوں نے مزید کہا کہ ’’حکومت نے ایمسا کا اطلاق کرتے ہوئے 500سے زائد ملازمین کو برخواست کر دیا جس سے عوام پریشان ہیں۔ ایسی حکومت سے ریاست کو خدا بچائے۔‘‘

قابل ذکر ہے کہ گزشتہ تین دنوں سے یوپی میں 102 اور 108ایمبولنس کے ڈرائیور ہڑتال پر ہیں۔ حکومت کی سختی کے بعد ایمبولنس خدمات کو فراہم کرنے والی کمپنی نے احتجاج کرنے والے ملازمین کے خلاف کارروائی کی ہے۔