حیوانیت کی تمام حدیں پار، بارہ سالہ معصوم بچی نذر آتش

ریاست اترپردیش کے ضلع کانپور دیہات میں اس وقت سنسنی پھیل گئی جب ایک گھر کے باہر سو رہی بچی کو نامعلوم شرپسندوں نے اغوا کرلیا اور پھر بعد میں اسے نذرآتش کردیا گیا۔

اطلاعات کے مطابق گذشتہ دیر رات کچھ نامعلوم شرپسندوں نے ایک بارہ سالہ معصوم بچی کو اغوا کرلیا اور بچی کو جلا کر ہلاک کردیا۔

مذکورہ سانحہ کی اطلاع ملتے ہی کانپور زون کے اے ڈی جی بھانو بھاسکر اور آئی جی موہت اگروال جائے واردات پہنچے اور تفتیش شروع کردی۔

بچی کے والد نے تحریری شکایت میں نابالغ کے ساتھ جنسی زیادتی کے بعد قتل کا اندیشہ ظاہر کیا ہے، فی الحال پولیس معاملے کی تحقیقات کررہی ہے۔

مذکورہ سانحہ پر علاقے میں سنسنی پھیلی ہوئی ہے۔ پولیس سپرنٹنڈنٹ کیشو کمار چودھری نے بتایا کہ پولیس نے معاملے کی تفتیش شروع کردی ہے۔ پولیس کا کہنا ہے کہ پوسٹ مارٹم رپورٹ کے بعد ہی جنسی زیادتی کی بات واضح ہوگی۔

لواحقین نے بتایا کہ لڑکی رات کو گھر کے باہر چارپائی پر سو رہی تھی، بچی کی دادی بھی اس کے ساتھ دوسری چارپائی پر سو رہی تھیں۔ جب سب صبح اٹھے تو بچی وہاں موجود نہیں تھی۔ جس کے بعد لڑکی کی تلاش شروع کی گئی، تب پتہ چلا کہ گھر سے 200 میٹر کے فاصلے پر بچی کی آدھی جلی لاش امرود کے باغ میں پڑی ہے۔ جبکہ بچی کی لاش کے پاس ایک چارپائی بھی ملی ہے۔ اندیشہ ظاہر کیا جارہا ہے کہ حیوانوں نے چارپائی پر جنسی زیادتی کی واردات کو انجام دیا ہوگا پھر خود کو بچانے کے لیے بچی کو وہیں جلا کر فرار ہوگیا ہوگا'۔