کلکتہ ہائی کورٹ نے بنگال میں کورونا وائرس کے بڑھتے معاملات کے پیش نظر درگا پوجا پنڈالوں کو نو انٹری زون قرار دیتے ہوئے عام لوگوں کے داخلے پر پابندی لگا دی ہے۔ درگا پوجا مغربی بنگال کا سب سے بڑا تہوار ہے اور پوری ریاست میں بہت دھوم دھام سے یہ تہوار منایا جاتا ہے لیکن اس بار کورونا وائرس کی وبائی شکل اختیار کرنے کی وجہ سے تہوار کا رنگ پھیکا پڑتا نظر آ رہا ہے۔
درگا پوجا کے موقع پر کولکاتا شہر کے علاوہ کئی اضلاع میں بڑے پیمانے پر پوجا پنڈال بنایا جاتا ہے۔ ان پنڈالوں کو نہایت خوبصورتی سے سجایا جاتا ہے۔ خصوصی طور پر درگا پوجا کے موقع پر کولکاتا شہر میں ان پنڈالوں میں نت نئے فنکاری کے نمونے پیش کیے جاتے ہیں، جسے دیکھنے کے لئے دور دراز سے زائرین تشریف لاتے ہیں لیکن اس بار معاملہ بلکل مختلف ہے۔
کوورنا کے روز بروز بڑھتے معاملات کو دیکھتے ہوئے کلکتہ ہائی کورٹ نے ان پنڈالوں میں زائرین کے داخلے پر پابندی لگادی ہے اور پنڈالوں کو بیریکڈنگ کرنے کی ہدایت دی ہے۔ صرف کمیٹی کے منتخب لوگوں کو ہی پنڈالوں میں داخلے کی اجازت دی گئی ہے۔
کلکتہ ہائی کورٹ کے اس فیصلے کے خلاف ریاستی حکومت کی سپریم کورٹ میں اپیل کرنے کی قیاس آرائی کی جا رہی تھی لیکن ریاستی حکومت نے واضح کر دیا ہے کہ وہ ہائی کورٹ کے اس فیصلے کو سپریم کورٹ میں چیلینج نہیں کرے گی۔ ریاستی حکومت نے کلکتہ ہائی کورٹ کا احترام کرتے ہوئے ریاست کے لوگوں سے گھر میں ہی تہوار منائیں۔
