کولکاتا: مغربی بنگال میں 8 مراحل میں پولنگ کرانے کے الیکشن کمیشن کے فیصلے خلاف ایڈوکیٹ ایم ایل شرما نے اپیل دائر کرتے ہوئے عدالت عظمی سے اپیل کی ہے کہ کمیشن کے اس فیصلے پر روک لگائی جائے کیوں کہ اس فیصلے سے آرٹیکل 14 (زندگی کا حق) اور آرٹیکل 21 کی خلاف ورزی ہے۔
واضح رہے کہ 26 فروری کو الیکشن کمیشن نے مغربی بنگال، آسام، کیرالہ، تمل ناڈو اور پڈوچری میں اسمبلی انتخابات کے شیڈول کا اعلان کیاہے۔ مغربی بنگال میں 27 مارچ سے 29 اپر یل تک آٹھ مراحل میں انتخابات ہوں گے ، تمل ناڈو ، کیرالہ اور پڈوچری میں 6 اپریل کو ایک مرحلے میں اور آسام میں تین مراحل میں پولنگ ہوگی۔
اس درخواست پر آئندہ چند دنوں میں سماعت ہوگی، اس کے علاوہ درخواست گزار نے کہا کہ مغربی بنگال میں مذہبی نعروں پر پابندی لگائی جائے اور اس طرح کے نعرے لگانے والوں کے خلاف ایف آئی آر درج کرائی جائے۔'
درخواست میں کہا گیا کہ 'جئے شری رام کے نعرے لگانے، دیگر مذہبی نعرے بازی کی وجہ سے مذہبی اشتعال کا ماحول پیدا ہورہا ہے یہ تعزیرات ہند اور عوامی نمائندگی ایکٹ 1951 کے تحت جرم ہے۔
درخواست گزار نے کہا کہ 'جے شری رام ' جیسے نعرے انتخابی فائدے کے لیے استعمال ہوتے ہیں۔ اس لیے انتخابی موسم میں اس پر پابندی عائد یونی چاہیے۔
یواین آئی
