مغربی بنگال میں اسمبلی انتخابات کے مد نظر جاری انتخابی مہم کے لیے جلسے جلوس کا اہتمام ہو رہا ہے جہاں کثیر تعداد میں بھیڑ بھی ہو رہی ہے۔ سی پی آئی ایم نے اس طرح کی بھیڑ سے گریز کرنے کا فیصلہ کیا ہے۔
کورونا کے کیسز میں دن بہ دن اضافے کے باوجود مغربی بنگال میں اسمبلی انتخابات کے لیے تشہیری مہم شباب پر ہے جہاں کثیر تعداد میں لوگ جمع بھی ہو رہے ہیں اور کورونا وائرس سے بچنے کی تدابیر پر بھی عمل نہیں کیا جا رہا ہے۔ ایسے حالات میں بایاں محاذ نے مغربی بنگال اسمبلی انتخابات میں باقی بچے مراحل میں تشہیری مہم کے تحت کسی بھی طرح کے بڑے جلسے یا جلوس نہ کرنے کا فیصلہ کیا ہے۔ اس کے بجائے بایاں محاذ کے امیدوار محدود تعداد میں اپنے کارکنان کے ساتھ گھر گھر جا کر تشہیر کریں گے۔
آج اس سلسلے میں ایک پریس کانفرنس کے دوران سی پی آئی ایم کے رہنما محمد سلیم نے اعلان کیا کہ بایاں محاذ چھوٹے چھوٹے جلسے جلوس کی شکل میں انتخابی مہم جاری رکھے گا۔
محمد سلیم نے کہا کہ ہماری پارٹی نے خود یہ فیصلہ کیا ہے کہ مغربی بنگال اسمبلی انتخابات کے باقی چار مراحل کی پولنگ ہو چکی ہے۔ پانچویں مرحلے کی پولنگ کی انتخابی مہم بھی آج ختم ہوگئی'۔
انہوں نے کہا کہ 'جہاں تک ممکن ہوگا ہم لوگ بڑی بھیڑ سے گریز کریں گے۔ دوسری جانب ہم عام لوگوں کو کورونا وائرس کے خطرات سے بھی آگاہ کریں گے۔ گذشتہ ایک برس سے کورونا وائرس کے بحرانی دور میں ہم نے لوگوں کی مدد کی ہے، اس کو جاری رکھیں گے۔ عوام کے حق کی لڑائی جاری رکھیں گے۔
محمد سلیم نے کہا کہ اس دوران ہم اپنے امیدواروں کے لیے انتخابی مہم گھر گھر جاکر کریں گے کسی طرح کی بھیڑ جمع نہیں کریں گے۔
