مرشدآباد ضلع کے جنگی پور اور شمسیر گنج میں آئندہ 13 مئی کو انتخابات کرانے کا الیکشن کمیشن نے اعلان کیا تھا۔ جس کے بعد سے ریاست کے مسلمانوں کی طرف سے اس کی مخالفت کی جا رہی ہے۔ اس سلسلے میں آج ریاستی الیکشن کمیشن کے افسران کے ساتھ جماعت اسلامی کی قیادت میں مسلم تنظیموں کی ایک وفد نے ملاقات کی۔ وفد میں جماعت اسلامی حلقہ مغربی بنگال کے صدر مولانا عبدالرفیق کے علاوہ جمعیت اہل حدیث کے جنرل سیکریٹری مولانا معروف سلفی، جماعت اسلامی حلقہ مغربی بنگال کے سیکریٹری شاداب معصوم اور دوسرے لوگ شامل تھے۔
ای ٹی وی بھارت سے بات کرتے ہوئے جماعت اسلامی حلقہ مغربی بنگال کے صدر مولانا عبدالرفیق نے کہاکہ انہوں نے الیکشن کمیشن سے کہا کہ عید کا تہوار مسلمان ہی نہیں بلکہ تمام مذاہب کے لوگ اس تہوار میں شامل ہوتے ہیں ایسے میں عید کے دن الیکشن کی بات کسی طرح قابل قبول نہیں ہے۔'
انہوں نے بتایا کہ الیکشن کمیشن کے افسران کے سامنے ہم نے جنگی پور اور شمسیر گنج میں الیکشن دو روز قبل یا دو روز بعد کرانے کا مطالبہ کیا ہے۔ انہوں نے بتایا کہ ریاستی الیکشن کمیشن کی طرف سے ہمیں یقین دہانی کرائی گئی ہے کہ جنگی پور اور شمسیر گنج میں الیکشن کی تاریخ میں تبدیلی کی بات پر غور و فکر جاری ہے۔ ہم نے مرکزی الیکشن کمیشن کو اس سلسلے خط لکھا ہے اور تمام باتوں سے آگاہ کیا ہے۔ امید ہے کہ بہت جلد اس پر کوئی فیصلہ لیا جائے گا اور نئی تاریخوں کا اعلان کیا جائے گا۔'
مولانا عبدالرفیق نے مزید کہا کہ ہم شیتل کوچی میں مرکزی فورسز کی گولیوں سے چار مسلم نوجوانوں کی موت کا بھی معاملہ اٹھایا اور اس طرح کا واقعہ دوبارہ نہ ہو اس پر الیکشن کمیشن کو غور و فکر کرنے کی اپیل کی اور انتخابی تشہیری کے دوران مذہبی منافرت پھیلانے والوں کے خلاف کارروائی کرنے کی بھی اپیل کی ہے۔
