مغربی بنگال کے مدنی پور ضلع کے مہیشادل تھانہ علاقے میں ترنمول کانگریس کے ایک رہنما پر سرکاری منصوبے کے تحت پکا مکان مہیا کرانے کے لیے دباؤ ڈالنے کا معاملہ سامنے آیا ہے۔
ذرائع کے مطابق درخواست گزار نے ترنمول کانگریس کے رہنما پر بنگلہ رہائش منصوبہ (Bangla Housing Scheme) کے تحت گھر دینے کے نام پر ہزاروں روپے کٹ منی دینے کے لیے دباؤ ڈالنے کا الزام عائد کیا ہے۔ چوک غازی گاؤں سے تعلق رکھنے والے والے شیخ محمود کا الزام ہے کہ ان کے پاس تمام دستاویزات ہونے کے باوجود مغربی بنگال رہائش منصوبہ کے تحت اب تک انہیں گھر نہیں ملا ہے۔'
انہوں نے کہاکہ جب انہوں نے گرام پنچایت رکن ابھیجیت داس سے رابطہ کیا تو انہوں نے پکا مکان مہیا کرانے کے لیے 70 ہزار روپے بطور کٹ منی دینے کو کہا۔ ترنمول کانگریس کے رہنما پر یہ بھی الزام ہے کہ انہیں جب تک رقم نہیں ملے گی اس وقت تک انہیں مکان نہیں دیا جائے گا۔'
شیخ محمود نے بلاک ڈیلپومنٹ آفیسر سے ترنمول کانگریس کے رہنما کے خلاف شکایت درج کرائی لیکن اب تک اس معاملے میں کوئی کارروائی نہیں کی گئی ہے۔'
مزید پڑھیں:
بلاک ڈیلپومنٹ آفیسر اس معاملے میں کچھ بھی کہنے کے لیے تیار نہیں ہیں اور پورا معاملہ سیاسی رنگ لے چکا ہے۔'
بی جے پی کا کہنا ہے کہ ترنمول کانگریس کے بیشتر رہنما کٹ منی لے کر عوام کا کام کرتے ہیں۔ ریاست میں کٹ منی کی حکومت چل رہی ہے۔'
دوسری طرف ترنمول کانگریس کے رہنما ابھیجیت داس کا کہنا ہے کہ شیخ محمود کا الزام بے بنیاد ہے۔ شیخ محمود کے پاس پہلے سے ہی پکا مکان تھا۔ اس منصوبے کے تحت پکے مکان میں رہنے والے لوگوں کو دوبارہ مکان یا اس کے لیے رقم نہیں دی جا سکتی ہے۔ بی جے پی بے بنیاد معاملے پر سیاست کر رہی ہے۔'
