آج ساڑھے گیارہ بجے وزیر اعلیٰ ممتابنرجی اچانک ابھیشیک بنرجی کی ہیرس اسٹریٹ کی رہائش گاہ پر پہنچیں اور وہاں دس منٹ تک رکیں۔ ممتا بنرجی، ابھیشیک بنرجی اور ان کی اہلیہ سے ملاقات کرنے کے بعد وہاں سے روانہ ہو گئیں۔ ان کا قافلہ روانہ ہونے کے محض تین منٹ کے بعد سی بی آئی کی ٹیم ان کے گھر پہنچ گئی۔ ذرائع کے مطابق سی بی آئی کے افسران 8 صفحات پر مشتمل سوالات کے ساتھ پہنچے تھے۔ سی بی آئی کی ٹیم میں خواتین افسران بھی شامل ہیں۔
وزیراعلیٰ نے ابھیشیک بنرجی اور ان کی اہلیہ کو یقین دلایا کہ وہ انہیں کسی پریشانی میں نہیں مبتلا ہونے دیں گی۔ انہوں نے تحقیقات میں تعاون کرنے کا مشورہ بھی دیا ہے۔
ذرائع کے مطابق روجری بنرجی نے سی بی آئی ٹیم کو بیشتر سوالوں کا جواب نہیں دیا ہے۔ ڈیڑھ گھنٹے تک جاری رہنے والی تفتیش میں انہوں نے سی بی آئی کے اکثر سوالوں کے جواب میں ایک ہی طرح کا جواب دیا کہ 'مجھے نہیں معلوم، مجھے اس بارے میں کوئی خبر نہیں ہے، میں اس سلسلے میں کچھ نہیں بول پاؤں گی۔'
اس کا بیان سی بی آئی نے ریکارڈ کیا ہے۔ تفتیشی ٹیم میں شامل عہدیداروں نے بتایا کہ پوچھ گچھ کے پورے سیشن کے پہلے آدھے گھنٹے کے دوران ان سے سوالات پوچھے گئے۔ اس کے بعد ان کے بینک اکاؤنٹس اور اس کے بیرون ملک میں لین دین سے متعلق سوالات پوچھے گئے۔
سی بی آئی ذرائع نے بتایا ہے کہ اہلکار ان کے جواب سے مطمئن نہیں ہیں اور انہیں دوبارہ پوچھ گچھ کے لیے نوٹس دیا جاسکتا ہے۔
قابل ذکر ہے کہ اتوار کے روز ہی سی بی آئی نے روجری کو انکوائری میں شامل ہونے کے لیے نوٹس دیا تھا، جس کے بعد انہوں نے پیر کو ایک خط لکھا تھا جس میں انہیں منگل کی صبح گیارہ بجے سے سہ پہر تین بجے تک پوچھ گچھ کے لیے دستیاب رہنے کی ہدایت کی تھی۔
قابل ذکر ہے کہ ابھیشیک کی اہلیہ پر کوئلہ اسمگلر انوپ مانجھی کے بینکاک اور لندن اکاؤنٹ میں کروڑوں روپے کی منتقلی کا الزام ہے۔
(یو این آئی)
