بس خدمات بحال ہونے کے روشن امکانات

کورونا وائرس کی دوسری لہر کی رفتار سست پڑنے بعد محکمہ ٹرانسپورٹ نے کورونا گائیڈ لائن کے تحت بس خدمات دوبارہ بحال کرنے کا مثبت اشارہ دیا ہے۔

مغربی بنگال میں آئندہ کل یعنی 15 جون کو لاک ڈاؤن ٹو کی معیاد مکل ہو جائے گی اور اب دیکھنا یہ ہے کہ اس سلسلے میں ریاستی حکومت کی جانب سے کیا فیصلہ لیا جاتا ہے جس کا لوگوں میں بے صبری سے انتظار ہے۔ حالات میں تیزی سے بہتری آنے کے بعد معمولات زندگی بھی پٹری پر لوٹنے لگی ہے۔

ریاستی محکمہ ٹرانسپورٹ نے کورونا گائیڈ لائن کے تحت سرکاری اور غیر سرکاری بس خدمات دوبارہ بحال کرنے کا اشارہ دیا ہے۔محکمہ ٹرانسپورٹ کے مطابق سرکاری بس ملازمین سمیت دیگر ٹرانسپورٹ کے ملازمین کے لیے ویکسینیشن مہم مکمل ہونے کے بعد بس خدمات پر دوبارہ غور کیا گیا ہے۔ اس کے لیے نوٹیفکیشن جاری نہیں کیا گیا ہے۔ انہوں نے مزید کہاکہ کورونا وائرس کی دوسری لہر کی رفتار سست پڑ چکی ہے۔ اس درمیان کورونا گائیڈ کے تحت محکمہ ٹرانسپورٹ کو بحال کیا جا سکتا ہے۔ 50 فیصد مسافروں کے ساتھ بس خدمات دوبارہ بحال کی جا سکتی ہے۔ دوسری طرف پرائیوٹ بس مالکان پہلے ہی واضح کر چکے ہیں کہ جب تک کرائے میں اضافہ نہیں کیا جاتا ہے اس وقت تک سڑکوں پر بسوں کو اتارنے کا کوئی ارادہ نہیں ہے۔واضح رہے کہ مغربی بنگال میں گزشتہ ماہ چھ مئی کو ریاستی حکومت نے کورونا وائرس کی دوسری لہر پر قابو پانے کے لیے لوکل ٹرین، میٹرو ریل اور پرائیوٹ بس خدمات معطل کرنے کا اعلان کیا گیا تھا جو آج تک جاری ہے۔