ریاست مغربی بنگال میں منعقد ہونے والے اسمبلی انتخابات کے پیش نظر تمام سیاسی جماعتوں کی تیاریاں عروج پر ہیں، حکمراں جماعت ترنمول کانگریس اپنے باغی رہنماؤں کو بی جے پی میں شامل ہونے سے روکنے کے لیے بھرپور کوشش میں مصروف ہے۔
وہیں بی جے پی دل بدل کے کھیل میں اپنی طاقت میں مزید اضافہ کرنے کی کوشش میں مصروف ہے، کانگریس، لفٹ فرنٹ اور اس کی سولہ حلیف جماعتیں حکمراں جماعت ترنمول کانگریس اور بی جے پی کو روکنے کے لیے سڑکوں پر اتر چکی ہیں۔
بی جے پی کے ریاستی صدر دلیپ گھوش نے کہا کہ گزشتہ برس 2019 میں لوک سبھا انتخابات میں ترنمول کانگریس ہاف اور 2021 میں صاف ہونے والی بات حقیقت ہونے والی ہے، ترنمول کانگریس کی ایکسپائری ڈیٹ ختم ہو چکی ہے، ممتا بنرجی کی قیادت والی ریاستی حکومت کا جنوری میں جانا تقریباً طے ہے۔
انھوں نے مزید کہا کہ عوام ترنمول کانگریس سے اوب چکی ہے، اور اب وہ ترقی چاہتے ہیں، اسی وجہ سے وہ ترنمول کانگریس کو چھوڑ کر بی جے پی میں شامل ہو رہے ہیں۔
بی جے پی کے ریاستی صدر نے کہا کہ کورونا وائرس جائے یا نہ جائے لیکن ترنمول کانگریس کا جانا تقریباً طے ہوگیا ہے، ریاست میں حکومت کی کوئی بات نہیں سنتا ہے، وزیراعلی ممتا بنرجی اپنی کمزوری دور کرنے کے بجائے بی جے پی کو ہدف بنا رہیں ہیں۔
